الشاعر سيدعبد الغنى عبد الصمد - الجـنسية مصري

استنظار

شايفك ياصديق
لساك على نفس الطريق
ماشى
برغم الواغش حواليك
برغم انك
مانتاشى
ماسك ف ايدك سيف
ولامطرقة
ولساها هي هي ..مستنظرة
…..
وحين كانت السطور للكتابة
متحضرة
غاب الكلام
وحين كانت الرقابى للقطف
متحضرة
مات السلام
وحين متنا كلنا
جوه جلدنا
كانت جوانا
نفسها تتكلم
تقول وتحكى وتعلم
الطفل اللى بيحبى
المشى ع الرجلين
وعيون البنات لساها بتطل
من فوق عيدان الذرة
مستنظرة
تهاجر الكلمة م الحلوق
ممصوصة ع الشفايف
القلب مطوح وخايف
تلف حوالين النخلة
تدوخ وتدوخها
وحين كانت بتتسند على حيط الجيران
رجعت لنفس المكان
والحال
هوه هوه الحال
مليون سؤال وسؤال
متحنطين ..
مصلوبين
فوق جذوع النخل
وبين النخلة والنخلة
متجهمة عيون البنات
مستنظرة
#بقلمى@سيدعبدالغنى عبدالصمد

٠٠٠٠٠٠٠٠٠٠٠…….٠٠٠٠٠٠٠٠٠٠

بابعت رسالة
بابعت سلام
رغم عسكر السلطان
ف كل حركة اوسكون
لابد يوم راح توصلك
كلمة…..
من كل الكلام

من بين عيون المشربية الالف
عيون بتطل عليا
تلمحنى
وانا جاي ف السكة
يادوب اعدى رجليا
احط ايدى ع الجرس
تفتحلى…
وتاخدنى بالاحضان
احلم تكون من غير
٠٠٠٠…… حـــرس
#بقلمى@سيدعبدالغنى عبدالصمد

عنيكى متاهة

مكتوب انى اجيلك
على ضفافك من تانى امشى
احفر ف صخر الحياه
وعلى وتر قلبها
اغنيلك
واناديلك

ورغم القساوة والدموع
والخوف على ضوء الشموع
والتردد حين الرجوع
لسانى حاسس بانى
لابد ارحل فى ترابك
ومن قاب حباته
اتخلق
انبدل
اسيل جوه شرايينك
تفتحى مشربياتك
ترمينى جواها
آه…. وآهين
عنيكى متاهة
وانا…
عطشان لعنيكى موت
عطشان يدخلنى صوت
من بواباتك العشرة
واحن للعشرة
لكين….
على بابك….. مشانق
جواكى…….. مشانق
وانا الريــــح…
جوه قلبى….
زاعـــق
مستنى يشوفك
بس امتى وفين
آه….. وآهين
عنيكى متاهة
وانا….
عطشان لعنيكى موت

غنائية ف حب مصر

حبيبتى….
يامركب شايلة قلوب ملايين
لما قلوعك. يوم تتقطع
راح اوصلها بالشرايين
راح امشيكى بقلبى وعمرى
والم عضامى واخليها صارى
وتسبقى كل مراكب الدنيا
بس ف يوم
مش ف سنين

لماعيونى فوق بابك… تتعلق
وشبابيك مشربياتك ف وشى…. تتغلق
احسن بوحشة جوايا
كإن قلبى بات برايا
يلف عليكى ويدور
ويرجع تانى جوايا.. يتكور
الاقينى بعيد عنك..
احلم..
اكون حصوة مابين اللولى ف ترابك
احلم..
اعيش عمرى..ف احضانك
مع نيلك
وتوبك الاسمر
واهرامك

حبيتك….
ولأول مرة أحس بقلبى..
بينبض
وعروقى.. بترفض
دمى الفاسد
بتغير فيا ملامحى
بتكسر فيا الواحد
تقسمنى اتنين
نصى ونصك
نتجمع… نتلم
ونْكَوِن تانى الواحد

لما عيونى عيونك وسط الزحمة
تتوه…
وتخاف
يقع الفاس ف المحظور
تنشاف…
تدارى وسط كتاف الماس
بخضر نحاس القلب
تنعاد…
يتبيض…
تنشال القشرة

تنزرع البذرة
تكبر…تتحول
تصبح شجرة
تطرح حب
يتوزع
للعبد وللنخاس

فلايك… فلايك
الموج عالى والبحر هايج
وتخلق عيونك منى….
فلايك
فلوكة ف البحر تعدى
وفلوكة ف النيل غرقانة
وفلوكة ولامرة تهدى
وفلوكة م الريح تعبانة
وفلوكة ماشية من غير شراع
مفرود جناحها
يعلنها….
لحظة وداع

#بقلمى@سيدعبدالغنى عبدالصمد

احضان عنيكى

طويت قلبى
وقلت اسافر
بشوقي ليكي
وكل ماابكي
اوحتي اغني
الاقي عمري
من نور عنيكي

حبيت اجيلك
آه واقولك
ع اللي بيا
اللي ….تاعبني
واللي ….دابحني
واللي..قاتلني
عشان بحبك

لقيت سفاين
شايلة مداين
عايمين لشطك

نطيت لشمسي
غيرت امسي
وحلمت بكره
ييجي بمداين
شايلة سفاين
بتعوم لشطك

تحدف سفينة
علي كل مينا
فيها البشاير
فيها الاميرة
قبطانها مصري
او ابن سينا
ماتفرقشي عندي
ماالكل عربي
وكل عربي
ف الهم وطني
وكل وطني
بيموت شهيد
لاجل ارضه
اولاجل ارضي

والباقي عندي
هو حبك
طويت قلبي
ورحت راجع
بشوقي ليكي
حبيت اغني
لاقيتني مرمي
ف احضان ..عنيكي
#بقلمي@سيدعبدالغنى عبدالصمد

إستسـلام!!!

ممطوطة ياشِفَّة لقدام
غايب ياناب ف اللحم
متهدل ياجلد فوق العضم
ناسيانى ياكل الايام

راجع
راجع وشايل
همى التقيل
وف رنة الخشبة فوق الارض
بافتكرك ..يارِجْلِين
وانتى بتجرى
وعمرى معاكى بِيْقِل
ويقل النبض

راجع….
راجع وف جيبى حكايات
عن جذر ومد
عن سيف .. يطلع م الغمد
وبرمشة ..تدمى العين
ويسيل الدمع علي الخدين
وع الاسفلت
تتمدد الخطوة …وتموت
ويفوت ..
خيط الشمس …ينسانى
افتكرك من تانى
انتى زى ماانتى بالامس
ح تكونى ف الغد

عجلة وبتلف
تلضم حرف جمب الحرف
تعمل صف
تِحْبِى..تمشى
تِحْبِى.. تموت
عجلة وبتدور
يتنفذ المقدور
ارجع شايل فوق كتفى
همى..
رافع راية الاستسلام!!!
#بقلمى@سيدعبدالغنى عبدالصمد

انا …..وانتى
مفتول من سعف النخيل
ممزوج بريحة الطين
مرسوم وبايد فنان
الننى ف البرواز….
بره العين

مرعوشة الايد خايفة تسلم
بتعد الهوا ع الصوابع
عارفة الطريق لجوايا
لابسة شموس البشارة
تاج علي جبينك
فاضة بكارة حلمك
بينى وبينك حد الرصاصة
بتغنى .. المستحيل

وللمواويل ..
لون القوافل…. طعم الرحيل
وتسيل…
عيون الناس ف البرواز
تنتهى هندسة الشكل الطويلة
تتولد من شظاياكى….
حبة قمح
واتوه جوه جسمك الفضى
من لسع النار تنتفضى
تعلنى عن افلاس شرايينك
ترقعى الشعارات الغريبة
تدورى ف دفاترك القديمة
عن معنى للروح
تدوبى طحين العضم ف الفنجان
تنفد بقايا انفاسك
تخترق صدرى
وتتأله ف ثنايا الجوف
ترتيلة

بقلمى@سيدعبدالغنى عبدالصمد

رباعية….

ياقمر كل يوم
مالك كده سارح كل يوم
بتجيب معاك ليل غريب الطعم والريحة
والشكل واللون
لو كنت عارف فين مكانك
كنت اجيلك …
اقفل عليك
واشوف ..
ح ييجي منين الليل كل يوم
#بقلمي@سيدعبدالغنى عبدالصمد

آه……يابلد

ف عنيكى…… رحيـــل
وف لياليكى….قمرةبتبكى
طول الليل..
دمعة..
عذاب وشقا
ودمعتين
خطين
بين ولقا

وف حواريكى
دايما بتلاقينى بٱكون..
زى مااكون
كما الاخبار البايتة
المعلن عنها صباحاً…
ف الجرانين
وبتصلبينى ف كل طريق
وانا.. الجنين
والشرنقة

وآه … من قهرك يابلد
وآه.. على ضهرك اللي… انجلد
ولإمتى حداديكى
ياكلوا ولادك الثوار
ولإمتى ح اداديكى
وارضعك لبنى مع الصغار
ولإمتى تنكرينى
ولإمتى ح افضل فاكر إنى
ليكى …ولــــد
آآآآه …وآه يابلد
#بقلمى@سيدعبدالغنى عبدالصمد

انكســـــــــــار

(( ياملح دايب ف بحر السكات
اول بدايات العذاب من هنا
واول بداية للحكايات البسيطة))

اعذرنى يا……… صديق
حين انحسار المد
فوق الرصيف
باغرق
لحظة ولادة….
الليل وبلادة…..
الاجسام الدايرة ف دورة الارض
وانكسار الدم
وسرعة النبض
حاسس باني
طريد المشاكل
يابو الوش متآكل

دخل خزف الصواني الباردة ف عيونى
نادونى…..
ناديت….
آويت …
الحزن المِتَّاخِر ف عيون الخلق
آويته حتى الحلق

يا……صديق
يداهمنى ليل الشتا
طابع اختامه على كل الحيطان
تدخلنى البيوت حتى الوريد
تطقطق الضلوع على باب الرئــة
تسد آخـــر طريق للخروج
#بقلمى @سيدعبدالغنى عبدالصمد

حديث …. بيني وبينها

اونطة…..
…. اونطة
كل يوم تاخدنى وتودينى
من حتة لحتة
وكل يوم بتقول كلام
خلاص
مابقتش بآكل م الاونطة

ياااااااه…
كل ده عشان بس
قلت اني بحبك
ماالكل ياما… قالهالك
ولف بيكى ودار
من محطة ولمحطة
ومن شارع لشارع
ومن حارة لحارة
وحتة لحتة
لما دوخك
وف الآخر٠٠٠٠٠
سابك٠٠٠٠
وطار
اشمعنى انا
كل ماأقولك بحبك
تقوليلى هات دليل
انا سمعت ياما
وشفت برضه كتير
طيب قوليلى
اجيبلك منين بس دليل
ماعمرى كله خدتيه
وليلى ونهارى عايشة فيه
حتى بينى وبين جلدى
عششتى فيه
وف الشرايين
مشيتى قبل دمى
وسبقتيه
ووصلتى لحد قلبى
وسكنتى فيه
وبقى ملكك
ومابقتش قادر عليه
طيب قوليلى بقى
اجيبلك منين انا دليل
وانتى بقيتى انا
وبقيتى انتى
الدليل
#بقلمى@سيدعبدالغنى عبدالصمد

جواسيس

رغم خوفي
لسه شايلك ف جوفي
بس كلمة
نفسي اقولها
بس خايف
يلمحوها وهي خارجة
ف سكة ضلمة يخطفوها

يحبسوها جوه قمقم
يعلنوا وبكل فرحة
انه تم القبض يومها
عليها خارجة مني ليكي

يقلبوا الدايرة مربع
يعلنوا وف كل موقع
شد حالة الطوارئ
يمنعوكي م الكلام
م السلام
م الاشارة
يحوطوكي بالعيون
لوتفتحيها راح تقوم
الف غارة

صدقيني
مهما حاولوا
مهما قاولوا
الحقيقة برضه جاية
من عنيكي ولعنيا
نبع ذاتي للبشارة

لو يلفوا الكون عليكي
الف حبل والف طوق
لو يمنعوا عن عنيا
كل يوم نور الشروق
برضه جايلك ياصبية
خطوتي…
شايلة الامارة
#بقلمي@سيدعبدالغنى عبدالصمد

المغنى الفقير

الليالى ….محزنة
الامانى الراقدة ف قلوب البشر محزنة
والعيال…
حتى الاغانى … محزنة
قال المغنى الفقير غنوته
وانهى المسألة

( يامفرقين الشموع….)
مدت ايديها تلم النقوط
( قلبى نصيبه فين…؟)
فرد منديله يلم غلته
فتح المعلم النوتة
قيد حساب الشهر
قهوة…. شاى
قرفة…. جنزبيل
ينسون….
مغات
مات
مااااااات …
يامعلم مات

انا لله وانا اليه راجعون
فتح النوتة
قطع الصفحة
طلب الرحمة
قال…..
العزا بالليل
ف بيت المغنى الفقير
#بقلمى@سيدعبدالغنى عبدالصمد

طريـــق
=====

ياخطوة جاية من بعيد
على قبر الشهيد
رسمتك طفل ومراية
وايد ف الايد
وخط عنيد
بلا نهاية
الشعر فاض به الكيل
ياوتر مشدود
اتهد الحيل
ياقاب شارب عكارة الزمن
سرداب طويل
وفاتح ع البدن
لسَّــاي باموت فيكى
لسَّــاكى…
بتموتى هناك
الحجر ف ايديكى
ياحزن ف البدن متآخر
انا..
ح آخد طريق
مالوش آخر
#بقلمى@سيدعبدالغنى عبدالصمد

ساعة مغربية

ياعيون بتهمس ف الفراغ
يا..حياتى
ايه اللى فاضل منى
غير انى
انتهى….
وتبتدى من مماتى

الليل … حَلَك
النور…….سَلَك
البحر…..جف
والحمل بين ضلوعى
عمره ماخَفْ

العتمة ف القلوب لساها عايشة
تِرِف..
تنزل ف الغيطان
تطقطق العيدان الهايشة
وبايشة…
خطاويا ف ليل مندي بالآهات

تجرنى زنازين الكلمة للسكات
اصرخ
تفتكرنى وتِتَّاوى ف توب الرهبنة
ماتخرج الا ان ديك الصباح
يصيح من مكمنك

من عيون الفجر اللى ضايعة
ف خيط الشبك

ف ساعة مغربية
وطيفك الحزين معدى عليا
دايرة الدايرة
ف الخليل واللد
وبامد
ايديا ماتطولشى غير
رذاذ الرصاص
غير.. عيون متحجرة

تحدفنى السكة لقدام
ترمينى وسط الخَيَّة
يزداد وسع العين المقفولة
مغلولة
ياايد مدفونة ف جيب فاضى
ملعونة
ياحكمة بتطلع ف دماغ
قاضـــى
#بقلمى@سيدعبدالغنى عبدالصمد

فارس وخيَّـــال….
الى صلاح چاهين
====================
٠
٠
٠
يافارس الحلم القديم
ياعذاب السنين العجاف
لسَّـانى بخاف
بارتجف ساعة السؤال
واحتمى ف حزنى الاليم
واسألك…
لحد امتى..؟!
لحد امتى ح تفضل جوه مكمنك
لحد امتى..؟!
ح تفضل حروفك
وكل احبالى الصوتية؟
لحد امتي..؟!
ح تموت
ف ضل التوت؟

والبيات وسط الفصول الاربعة
لحد امتى ح يفضل يسجنك..؟!
باتخيلك
كنت زمان…. باتخيلك
فارس نبيل ..
فارس للحزن آه
لكن… نبيل
مليان بالجرأة والامانى
وللغلابة تميل
يافارس الكلمة الاصيلة
كان خيالى بيجمح بيا كتير
وانا..
يافارسى النبيل
فقير
ضعيف على احتمال
نفس الحلم القديم
يافارس الحلم القديم
#بقلمى@سيدعبدالغنى عبدالصمد

ولاحد يقدر يمنعك
قول وعبر كما تشاء
ولانظرة منهم
ولاكلمة منهم
ممكن توجعك
سدد انت بس سهام شعرك عليهم
ح تلاقى الحريق ف قلوبهم
ونفوسهم منك مشعللة
وانت ولاحاجة
تحرقك
قلمك وشعرك ح يكونوا ليهم
محرقة
وممكن كمان يبيدهم من
فوق ارضهم
وانت واقف زى الجبل
ولاحاجة تهزك

#بقلمى@سيدعبدالغنى عبدالصمد

٠٠٠٠٠١

الحقيقة الوحيدة
ياعيون بتشغى ف الفراغ من زمن
نسَّــاى انا وانتى….
نسَّــاية
واصل مابينى وبينك
خيط امل
ومعجونة اوصالى
بطعم المحن

{{ حبيتك ٠٠٠٠ وسع الغابات
اللى حدودا حدود اللفتات}}

ويتحرش سيفك بالباقى من جسمى
تخدعك تميمة حظك
يخدعك حجابك المتعلق على صدرك
تحاصرنى آخر الليل
مابين الكلمة والكلمة
تفرد لى
ميت الف سكةوسكة
وتموت الفكرة
وينفض وش البكارة
واتوه مابين حدودى وحدودك
وفجأة تنرع منى

وتهيج الريحة النسيج الداخل جوه الجسم
تتفتق العروق ويا الشرايين
الدم يطرطش يمحى الاسم
ونغوص انا وانتى ….
ف حتةطين

بقلمى@سيدعبدالغنى عبدالصمد

أعانقكِ
أعانقكِ أمام الجميع ولا أبالى
وأكتبك كما تخطرين على بالى
أُمْسِكُ قلمى وأَخُطُكِ
هذا هو حالى
يالغةً أحاطت بى من كل حدَبٍ
وألقتنى فى أعماقها أعانى
لا تطلقينى إنني
عاقدٌ عليكِ لسانى
فلا أبوح إلا بكِ
وقلبى لا يعشق إلَّاكِ
عاميةٌ كنتى أو فصحى
فأنتِ .. أنتِ كل كيانى
#بقلمى@سيدعبدالغنى عبدالصمد

ليه بتخاف
==========

إخلق نفسك من بين الناس
إتشدد
تتجدد
لو ح تكون واحد ف المليون
اللي يعدوا نجوم الليل
أصبر بكره تنول
إوعى تخاف ولا تتهدد
إتشدد
قول الكلمة صادقة صريحة
إوعي تسيبها جوه الحلق
قاعدة جريحة
أصل الصادق دايماً مر
تمللي بيجرح
دايماً حر
وزيّ السيف
إوعى تقول
بكره ح أقول
وٱدي وش الضيف
عاند
ساند قلبك وعنيك
أصمد .. ليه بتخاف
ليه بتغمض عينك لما تشوف
عمرك ملك لربك وحده
عمره ماكان ملك لعبده
#بقلمي@سيدعبدالغني عبدالصمد

لا أدري
=====

عيونٌ تَهْمِسُ حتي لا تُسْمَعْ
وقلوبٌ إن تعشق تَدْمَعْ
وانا بينهما لا أدري
أكتابٌ أقرأ
أقطارٌ أركب
أم أني اسير علي دربٍ
يعدو فيعلو
وإلى السماء بي يصعد
*****
لا ادري أعمري ذاب
قطرةً قطرةً
ام انه ضاق
بأيامى وضجر
ولم يُبقِ لي شيئاً
ولم يُلقِ لي بالا
وانتحر
لم اشعر به وهو
ينساب بين يديَّ رويداً رويداً ثم إندثر
أهكذا يفعل الأحباب أم أنه مقدورٍ قد قُدِرْ
ليتني أعلم كُنهه أوحتي
يبعث دلالات تساعد في السفر
وقت الرحيل إذا ما أزَف ليس منه أيُ مفر
متى يأتي أو متى يمر
انه أمرٍ قد قُدِر
ماعلينا سوى الإنتظار
في الفجر يأتي
أم في الظهر
في العصر
أم في المغرب
في العشاء أم فى وقت السحر
لاندري هو يأتي
بلا إستئذان
ينفذ مابه قد أُمر
هو الموت لامحالة
لافِرار منه ولامُسْتَتَرْ
#بقلمي@سيدعبدالغني عبدالصمد

ياأزمةإشتدي أولا تشتدي
فإن أمَر الله ستنفرجي
وياليل إن طال ظلامك
فالصبح سيأتيك فيُبْلِجِ
وياخير سحاباتك ممطرة
بامر الله ان امر تجي
فالله مانحنا مانبغِ إن
نحن مشينا علي النهج
وله نفحات يوهبها لمن
تعرض لها حين الدَلَج
فيارب افض علينا من فيضك
واخرجنا بمغفرة من اللجج

قالولي قبل ماتكتب قصيدة
إعمل لها عنوان
يمكن ف ساعة رضا
يقولك سرها العنوان
أنا قلت إن عنونتها
وباح بسرها
أنا ح أمسحه
عشان فتان
وعجبي


شكوت نفسي لنفسي
فقادتني الى الشوق
وعدت الملم اشلائي
فرمت بي الى اليأس
فقلت رويداً رويداً
قالت شكوتني
فثأرت لنفسي
بقلمي@

اجاوبك بايه
وفين السؤال
اصل الاجابة
دايما بتيجي
بعد السؤال
واللي جوايا ليكِ
مايكفهوش جواب
ده عاوز يكتب ف كتاب
وهمسي بس ليكِ
الريح العواصف تحسب له
الف مليون حساب
واكتبلك مهما اكتبلك
لابد برضه بعلو الصوت
اقولك ....
بحبك بحبك بحبك
بقلمي@سيدعبدالغني عبدالصمد

مدللة انتِ
في كل زمان ومكان
للشمس للقمر
مدللة في كل الاكوان


ح نكتب رسالة عاشق
وحبه كان ف القلب راشق
ولا كان ليه ف اللوع
وكان بيحب الانسانية
وصوته ف الحق كان
زاعق
ونفس الكلام على قبر
صاحبه مكتوب