الشاعر سيدعبد الغنى عبد الصمد - الجـنسية مصري

قالوا الحنين
لابد مايكون ف القلب
والوجدان
أنا قلت لمين الحنين
ما الكل خدع وخان
وأجيب منين قلب للحنين
ماهو راح وضاع من زمان
وجه مكانه حجر صوان
وعجبي

قصيدة فانتازيا
=========
فانتازيا الاسقاطات
ولا ليها صلة اوصِلات
من قريب اوبعيد
بالاعتقاد اوبالصلاة
كل الحكاية
دماغ فاضية بتنز
بشوية ٱهات
ولاليها جولات
ولاصولات
وعمرها مانزلت الشارع
ولاتاهت يوم ف الطرقات
فاسمعوها أوإقروها
بقلب شارد وفكر تايه
وف سكات
أصلها فانتازيا عبيطة
شوية حروف مع كلمات
إتمشوا ع الكورنيش
فولدوها فأصبحت
ولما بانت
ماتت … و

فجأة قالوا قامت
فجأة قالوا نامت
هي قايمة ولا نايمة
ولاقاعدة
ماتفهمونا
هي إيه بس الحكاية
قالوا قامت عشان المم
عشان الحرية
عشان نتلم
ونلم
اللي باقي مننا
فجأة
قالوا هيييييه
نجحنا
وزحنا
من ع الصدور الغم
الكلام
كان واحد وواحد من الايام
وكان إتنين من الشهور
بعدها
لقينا الدنيا طابور
وقالوا سايبين الميدان
ح نِرَوَحْ خلاص ع البيوت
وبرضه فجأه
لقينا ناس ركبت الموجة
وف وسط الهوجة
قالوا ده إحنا كنا هيا
وإحنا اللي قمنا بيها
ده إحنا أولى بيها منكم
يعني لازم كده نحكمكم
وبقت فزورة
محتاجة حد يحلها
هي إيه
هي لعبة بتلعبوها
عشان تسرقوها
وتسرقوا مننا حلمنا
قالوا لأ ده حقنا
قلنا ماشي
ح نقوم نوافق
وفجأة
لقينا الدنيا غم
وعشنا تاني
شايلين الهم
إزاي يغور
إزاي نتلم
فجأه
قاموا
وقالوا فوضونا
نزيح عنكم وفوراً كل هم
أمال ما إحنا منكم
إحنا إنتم
نزلوا تاني للميدان
لفوا الشوارع كلها
وفوضوهم
وأما مسكوهم
قالوا
بصوا بقى
يعجبكم مايعجبكوش
توافقوا ماتوافقوش
بالنار ح تمشوا وبالمركوب
وح ناخد منكم أحلامكم
وح نديكم
أحلام بتناسب أحلامنا
ولسان مايقولش
إلا كلامنا
وعمر ماح يطول إيدينا الدم
أصل انتم ح تموتوا
بإيديكوا
مش بإيدينا
وتعيشوا تموتوا
مش فارقة معانا
ماانتم ف عنينا
ماهي أرضنا وبيتكم
وفيه ح نعيش
وح تبقوا انتوا الدراويش
الحرافيش
وعمرنا ما ح ننساكم أبداً
ٱه والله
ننساكم إزاي
ده كلام
ده انتوا نور عنينا
أمال مين ح يمَوِلنا
ويدينا
مش انتم
مين ح يصرف من جيبكم
مش إحنا
ربنا يخلينا ليكم
ولينا يخليكم
وأدينا قاعدين بنتفرج
وساندين ع الحيطة
نسمع الزيطة
وأكبر مافينا مِتْرَبَط
واصغر مافينا متلخبط
بيقول حاطة يابطة
هي كانت فزورة
ولَّا كانت نكتة
قالوا قايمة
قالوا نايمة
قالوا قاعدة
والحقيقة الواضحة جداً
انها كانت
وماتت
بقلمي@سيدعبدالغني عبدالصمد
جمهوريةمصرالعربية

عم أحمد
======
(إهداء الى الصديق الساكن حوش قدم عم احمد فؤاد نجم والى لمتنا في بيته)
=================
عمره ماكان خداع
ولاكان خاين
ولادلدول
وكان دايما باجدع لسان
يقول
مصر يا امه يابهية
ومهما تطلع المية
عمرها ماتوصل العالي
ويقلدوه
ويعلقولوا
النياشين ف ايده
ويقعدوه
ف الزنازين
يكتب
حواري وجواري
والم سنين وسنين
اصل الميعاد كان لسه ماجاش
ياام الولاد ياولادة
مخاضك اتأخر ايه
هو ابن شارع
ولاابن شاعر
ولا ابن ايه
ابن اللي ابنه ياسيدي
المهم انه ييجى
يشيل على كفه
كفنه ويلف بيه
جوه الزنازين
بره الزنازين
المهم هو البتاع
اللي ح يتشال عليه
مش اللي يركب فيه
وياما قال ع الليل وقساوته
وطرح النهود وحلاوته
وبرضه قال ع البرتقال
وجناين سعادة البيه
اه امال ايه
وجرى ياما ف الشوارع والحوارى
ولف يسحر الناس
ويطبل
قبل الفجر مايطلع
اقولك ايه
وايه بس اقول عليه
كان معجبانى
كان عم احمد علي حلم مصر عايش ومات برضه علي حلمها
بقلمي@سيدعبدالغني عبدالصمد

في دائرة الوطن
==========

بالهويات الصغيرة… نمشي
تحمل الكفوف القلوب
لمائدة السلطان هدية
ونمشي
منزوعي الاحبال الصوتية
نحلم
نتغنى بفتاة تُدعَى الحرية
وانا عائد في رأسي كل التذكارات الطفولية
وطريق العودة
ممتلئ بالاحلام الوردية
وفي دربي كانت
العصافير تشنق
والابواب تغلق
بلا كلام ولامنطق
وفي صدري رائحة الموت
وعفن الورد
اسمع تراتيل من حولي
شئت ام ابيت
سوف تدخل
ثم تحرق
وخلفك الابواب تغلق
بقلمي@سيدعبدالغني عبدالصمد

انا ….حلمك
========

شايلك على ظهري حِمل
بقالي سنين
ومهما قلت وإتكلمت
ح أشكي لمين
ماهو إنتِ حملي
وشكوتي
وإنتِ حلمي
وغنوتي
بس خلاص بجد
طفح الكيل
انا كنت ليكِ ف قوتي
ولحد ماإنحنيت
وكنتِ كل دنيتي
ودلوقتي انتهيت
وعصايتي صبحت سكتي
بقت دليلي
ف مشاويري
ونوري ف عز الليل
بس خلاص بجد
طفح الكيل
أخدتِ مني
أحلى مافيَّا
وعمري بعترتيه
رميتيه ف الحواري
والزنازين
عشقتيني
ضيعتي احلامي
كلها ببلاش
لحد قلب قلبي
ماباش
ولسَّاكِ برضه
رامية حملك عليَّا
نِفْسِك اقول الآه
ما ح اقولهاش
ماهو انتِ حملي
وشكوتي
وانتِ حلمي
وغنوتي
يابلد غيري
مايستحملهاش
انا حلمك الجاي
أنا الوليد
اللي لسه ماجاش
بقلمي@سيدعبدالغني عبدالصمد
جمهوريةمصرالعربية

حوارية بيني وبين ٠٠٠٠٠
============

انا اصلي كبرت
وخلاص
مش فاضل غير ايام
اوحتى ساعات
مش شايف
وعارف
ان اللي فات مات
**
وكمان يئست
اني اسمع منك
ايها رد
ما انا قاعد وياك ليل ويانهار
وشي ف وشك
يوم ورا يوم
و بافارقك بس عشان النوم
وانا باتكلم
وانت
زيّ الواقف زنهار
ومفيش رد
**
مش بيقولوا ان الاصحاب
بيبقي مابينهم
اخد ورد
واحنا اللي مابينا
كلام مني
ومنك صد
**
طيب قولي
مين غيرك
ح اشكي له همي
واحكي له عن إحساسي
وناسي
اللي سابوني لوحدي معاك
وفاتوني
بعد ماخدوا عمري
وايامي وأحلى سنيني
وف الآخر لهنا
جابوني
وباعوني
لأهل الدار
واديني قاعد باحكيلك
وانت ساكت
مش عاوز حتى
تكلف نفسك
تختشي على دمك
وترد عليا
وتقول ايها حاجة
قول ان انا غلطان
من ساسي لراسي
قول اني كبرت
وخرفت
وإني باكلم نفسي
اما انت صحيح
حتة كرسي
بقلمي@سيدعبدالغني عبدالصمد

لو أنبأني العراف
==========

لو أنبأني العراف
بأن جسر العودة سيصبح
جسدي
لبقيت فيكِ…..
في سجن عينيكِ الأحمر
لو أنبأني العراف
بأن الدار
وشجر التوت
سوف يموت
لكتبت على أبواب المدينة
على كل البيوت
على كوكب الأرض أمشي
فوق كوكب الأرض أموت
واكتب على كل تابوتٍ
إسمي
لو أنبأني العراف
ما كنت رحلت
ماكنت تركت
في ظل عينيكِ
جسمي
لو أنبأني … لو
بقلمي@سيدعبدالغني عبدالصمد

توت ..توت
=======

توت توت
حاوي توت
اصبر يابنى شوية
وطل
ع المحروسة م الشباك
اصل الواد برعى الفل
واقف لسه بيستناك
هو وعربي الملا
والواد عترة
ومعاهم شلتوت
كله واقفلك مستنيك
لجل يبارك ويهنيك
مستعجل على ايه بس
هى السكة ياواد ح تطير
ماهو رايح جاى
عمال ياخد ويشيل
وينزل ناس
ويركب ناس تانيين
وساعات برضه
بيبقوا بهايم
وياما فلقنا بالزمامير
اصبر لما اشبع منك
اصلك بتطول
ف الغيبة كتير
والمرة دي ياواد
حاساها انه ح ترجع
ماتلاقينيش
او ح تروح ومحاتجيش
ماانا اصلى عجزت
وجلدى كبر
يابنى عليا
شايف كيف اتكرمش
وبقى مهدل كيف اللغد
بالله عليكى تسكتى يامه
ده انتى اميرة وزى الفل
والعافية اللي عليكى
مالها مثيل ولازي
ايه ياواد
راح تحسدنى
علي حبة
عافية ف جسمى
شايلاهم من اسمى
وتد بنت شديد
امال ح اصلب طولى ازاى
يامه فداكى قلبى وعمرى
احسد فيك بس ازاى
ده انتى عنيا اللى باشوف بيها
و بدعواتك ربى حامينى
ومعيشنى ف احسن حال
احسد فيك بس ازاى
ده انتى غرامك
جوه ف قلبى
وبيجرى ف شرايينى
مع دمى
ويمكن قبله
حد بيحسد عمره ياامى
طيب اصبر
واقعد
اتهد شوية
واركب ف السكة الجاية
ماانت كمان ناسى الفطير
والوز ويا البط
والسمن البلدي المتسيح
دانا خضيت لبنه بيدي
ف الفجرية
والملوخية الناشفة
والمش
وكمان العيش الشمشى
ح تسيب الكل
وتمشى
طب اعمل لامك خاطر
ولا اقولك
عدي علي ابوك
ف الزراعية
وبوس ايده
وخليه يدعيلك
واوعاك تمشى من غير
ماتصالحه
وتطيب خاطره
ماهو برضك خايف ياولدى
عليك
وغرضه كان مصلحتك
مش انت كبير خواتك
حاضر يامه ح اروح له
ايه جابك دلوقتي
ياولدى
اتأخرت
وماوصلتش ف ميعادك
وفاتتك السكة
طيب مايهمش
انهض دلوقتى وشهل
لجل ما تلحق تركب
ف السكة الجاية
دى ٱخر سكة ح تعدى
ايه بس ياوالدي
اياك
لساك زعلان منى
طب ايه قولك
اني قاعد
ومانيش ماشى
وح ٱخد فاسى وأعزق
وازرع واسقى
الارض
ويللا انت ع الدار
عشان ترتاح
وإتْسَّنِدْ يابا عليا
مش انا عكازك
ولا نسيت
بس ياولدي ..
وحلمك
ده انت طول عمرك
عايش
قايم نايم
تحلم بيه
لا ياولدي لا
روح سافر انا مازعلانشى
يابا اسمعني
انا مش ح امشى
حلمك ابدى من حلمى
انا كان حلمى يابا عشانى
لكن حلمك انت عشانَّا
انا وخواتى
طب والحاجة
اللي امك تعبت فيها
ح نعمل ايه بيها
اذاكان ع الحاجة
ماتقلقش
راح ناخد منها شوية
ونطلع بيهم
على بيت عمى
حسن بن عطية
اشمعني ياولدى
علشان تخطبلى
بخاطرها
وتتفقوا مع بعض
على شوارها
يابني ازاي ماهي راحت وياعريسها خلاص البندر
ماهو خدها
عيسي بن محمد
ولَّا انت اياك مش عارف
خلاص يابا ولاتزعلش
ناخد بنت نبيل القرش
البت اللى اسمها سعدية
مش عارف ولاهندية
روح يابنى
ربى يسعد قلبك
دنيا واخرة
زى مادَخَّلْت السعد لقلبى
ويرضى عليك
وعلى اخواتك
ويصلح ليكوا ياولدي
الاحوال
طيب يابنى هو سؤال
ليه ماخترتش
خيرية بنت الجمال
اهي زيك متعلمة
ومتربية وعال العال
وجميلة وقيمة
وعليها عود
ولَّا التقسيمة
سبحان الخالق
الاعلي المتعال
يعني عياييلك ح يكونوا كيف شق القمر
وعنيهم زرق
وبتلبس كمان خلخال
سلك
اصفر بيلعلط
مش زي خلاخيل باقى النسوان
وبتضحك
اي والله بتضحك
لأ وايه وسنان
زي اللولى كمان
بتبان
ولَّا النبقة ولَّا الخال
كله ياواد فل
وعال العال
حيلك يابا
اهدى شوية
هى حلاوة م الجمعية
ولَّاسبية
نازل طالع
توصف فيها
تقولش قصادك واقفة
وواقف تِطَّلع فيها
ايه يابا من كتر مابصيتها
مانسيتها
ولَّا انت كمان
راح تعمل
زى الرجالة المهابيل
بتوع الكفر
قايمين
نايمين
بيحلموا بيها
وكل املهم
يرموا مرتاتهم
جوه البير
ويا العياييل
ولايحطوهم تحت السكة
لجل تاكلهم
اعقل يابا شوية وفوق
طب ليه يابنى ماتخترهاش
علشان يابا
انا عاوز واحدة تربيلى عيال
وتربينى كده وياهم
وتمشى معايا
جوه البيت
و ف قلب الغيط
وتكون سندي
وطراحتى
وتمشى كمان حسب القدرة
مش بقي تتلغمط كل شوية
ف اشى احمر
واشى بودرة
ولاتتلمط بلبانة
والرايحة والجاية
قاصدينها
ودا تقصيعة
ودا ضحكاية
يعنى يابويا عاوز
واحدة تشيل
ويايا
الحمل تقيل
واللي يشيل
لابد يكون بن غوالى
مش ضارب عينه ع العالى
وهو ابن سوارس
ومْجَالِسْ
الطين والجلة
وطالع فيها
ودي كده عاملة
وكنها عبلة
ولازم تاخد ابن فوارس
شوف يابا
ان ماكنتش مراتى
من توبى
وتكون عينها
عليك وعلي امى
وتبقي عليا هى الحارس
ماتكونش ولاتكون
عرفت يابويا
خلاصة القول
أَنِى….
عاوز مصرية
قرارية
صبارة عشرية
مهمن غبت تصون عفتها
وياكرامتى
وتلزم بيتها
وتكون فيه هي الملكة
واعملها تاج فوق راسى
واصون عشرتها
ولا دَخَلْشِ عليها حرام
ولا اَكِلْشِ عيالها حرام
وتفكرنى دايما بصلاتى
لو جِهْ يوم إنى نسيتها
وانا برضه افكرها
باذكارها
لونسيتها
ونصون بيتنا وولادنا
من الشيطان
ونحاجى علي بعض
واسرارنا جوه البيت
وف قلب الاوضة
ولايعرفهاش حد
حتي العياييل
وف قلب الغيط
ايدها بيدى
ونعيش وكإننا واحد
روح واحدة
لابسة جسدين
عرفت ياعم حسين
يللا نِرَوح بَقَىَ ع الدار
احسن دي أمى زمانها
واقفة علي باب الدار
وف عبها لاعب
ولامليون فار
علي تأخيرنا ف المشوار
ابودقيقتين
اللي قعدنا فيه ساعتين
طيب بس بشرط
اوعى تجيب لوتد سيرة
ع اللى انا قلته عن خيرية
بنت الجمال
احسن تبقى مصيبة وسيرة
وابات ف العش
بدال الفرش
حاضر يابا ماتخافش
#بقلمى@سيدعبدالغنى عبدالصمد

الفار المشهور
=========
(إهداء للشاعرالعبقرى
فؤاد حداد)
=°=°=°=°=°=°=°=°=°=°=

ولاكان ليا ف تكسير الصخر
وطلوع النخل العالى
ولاكان زمان
الجماد ليه ف الحبل
ولا اتمخض الجبل
ولاولدنى ..
ياعم فؤاد
ولَّا اقولك
ح احكيلك حِكْيِوة جميلة ياعم فؤاد
كنت إنت زمان
بتقول انك
الفار الفيراني
اللى مفيش زيك
طب ايه قولك
انا بقي فار تاني
بس انا فار مشهور
واول ماالكهربا
تقطع ينادوا باسمي
على طول
ويقولوا ….
عملها فار السبتية
وقرقض ف الكبل
طپ بالله عليك
انا برضه
ح اقرقض كبل
ليه
هو يعني عضمة
وانا كلب
ماتقولهم ياعم فؤاد
هي الفيران ليها ف الكلام ده
ده احنا يادوب
من ماسورة لماسوره
ومن سطح لسطح وف الغويط قوي
تحت الارض
وف البلاعات
لما البرد
خد منا
راقات وراقات
لوكنا بناكل ف الكابلات
مش كان زمانا
دفيانين
ومكهربين
اي حد لينا يقرب
ده احنا حتي خيبة
وبنخاف من ايتها دبيبة
لماتدب
بنترعب
وبنجري نستخبي
ورا أى عامود ضلمة
اه
استنى استنى
يمكن عشان كده قالوا احنا اللي بنقطعها
ونجيب الضلمة علشان جواها نستخبي
بقي ده اسمه كلام
والله ده زمن العجب
حتى شوف الجورنان
بيقول إيه
وانت ليه
بس سايبنى
ياعم فؤاد
عمال ألخبط
ف الكلام وباهلفط
مش كنت تقولي
وتنبهنى
للاعلان ………..
(اننا الآن فى زمن الفيران)
يعنى احنا دلوقتى ف زمانا
والفار هو عنترة
يادى المسخرة
ياولاد
طب يللا بسرعة
ياعم فؤاد
يللا ننادى
علي سعدية وبهية
ونجية وصفية
وباقى فيران السبتية
واوعاك تنسي البت وداد
لازم نِجْهَز كلنا للحفلة
اصل الليلة
انا ح اعمل ليلة
وح ارقص على ديلى
لحد الصبحية
وح اركب ع الحرباية
وع السحلية
وح امسك سيف
وح اروح بيت الواد
زعبوط
بتاع القط ابوديل
اللى كان عامل عليا
اسد
وح اروح ع القعدة
وح اخد احسن كرسى
وابقى الاول
وابقي كبير القعدة
واحكم واتحكم فيكوا
ماانتوا فيا ياما ذليتوا
اللي بشبشب واللي مقشة
واللى عصاية وبالنبوت
وح اضحك
وح ازقطط
وح اجيب الشمس اعملها غطايا
عشان ادفا
واطَلَّعْ برد العمر
من الجتة
واخد حتة
م القمراية
اجيبها لفارة قلبى
اصلى كنت واعدها
بحتة
من قرص الجبنة
اللي ف دكانة
عم حسين
اللى ع القمة
ف كوم الدكة
وجمبه كان ساكن
الواد زعزوع بن مخيمر
بتاع الواسطة
والواد قشطة
اللى ف طنطا
كان مواعدنى يجيبلى
مِشَّبِك
يعنى ..
لما أشبك
والبت بهانة
بنت عزيزة محزق
اصلها كانت لما بتلبس
ايها فستان
كان يبقى ملزق
والواد دومة بن الهرمة
اللى كان عاوز يقتلنى
بشريط م اللى بيلزق
كان عامل قال ذكى
وبيفهم
ماترد عليا ياعم فؤاد
ياعم فؤاد…
ياعم فؤاااااااااااااد
انت يازفت يافار
بطل خبط ف ضهرى
وبطل ترفيص
هدتنى
وخلتنى
مش عارف أنام
قوم يللا اصحى
وشوفلك حتة غير الناحية دى
ونام فيها
غور يلعن فار
اللى جابوك
#بقلمى@سيدعبدالغنى عبدالصمد

ابعت ياواد الشال (( إهداء إلى الناقد
الشاعر حمدى البوقى))
=================
ابعت ياواد الشال
من غير كلام كتير
لا تقولى قوتى
وقوت عيالى
ولا اى قول
انت ايه ياواد
هتعمل عليا كبير
ده انت كل خيرك
واللى انت فيه
من قوتى وتعب ايديه…
يا… كبير
أُمــَّـال….
اياك مانتاش عارف تعبت
فيك قد ايه
ده اللى مالوش خير
ف امه
ح يعيش
ولا عمره ح يشوف خير
لاتقولى عيال ولاقوت
وقوم يللا وفوت
وابعت بسرعة ياواد الشال
واقولك علي حاجة كمان
ماكنتش عاوزه اقولهالك
من زمان
عارف ام بهانة ٠٠٠
جارتنا ..
تلاقيك والله نسيتها
ام بهانة ياواد
اللى كانت دايما تعبانة
وكنت تقولي يامَّه
انا لما اكبر
راح اتجوز بهانة
عشان تقعد جار خالتى
وماتفوتهاش
اصلها غلبانة
كنت حنين ياواد
انما بقى ..
ح اقول ايه
لمارُحت هناك
ف بلاد مانعرفهاش
الظاهر ياولدى نسيت
ولَّا قسيت
والله ياولدى ماانى عارفة
يمكن انا اللى نسيت
من كتر الايام الرايحة
الجاية قصادى
وانا قاعدة قدام البيت
ده حتى الكانون مابقاش
بيدَّفى
اصل ياولدى
البرد عندينا
زى ماانت خابر
بيخش ع العضم
كده من غير خِشا
ولا استئذان
كأنه كابر بن كابر
وزمان
الله يرحم زمان
كنت بادفى بيكم
مش بالكانون
هو الكانون كان عمره بيدفى
ده كان انتم كلكم
انت واخواتك البنتة
والرجاجيل
وإِشّْ بقي لما كانوا
بييجوا العيايل
كان قلبى كده بيرفرف
ويطير
المهم بهانة
اتجوزت وجوزها جابها
تقعد جمب امها
عشان تراعيها
وتسندها
وجابولها حاجات ياما
عشان تدَّفى من البرد
عارف ياواد
ساعتها اتمنيت
انك تكون جارى
اتلفَّح بيك من بردالشتا
واعملك غطايا
ما انا اصلى اتشوقتلك
اتشوقت احطلك
اللقمة ف حنكك
واحضنك
لما سنانك تتكتك
من بردالشتا
ما انا كنت ياواد
ملحفتك ومخدتك
وكنت ..و..كنت
عصايتك
وحمايتك
من ايها حاجة
حتى ان كانت نسمة صيف اونسماية شتا
ماهو قلب الام ياضنايا
مابيستحملش
يووه .. ياواد
خليتني دوشتك
وعطلتك
كده برضه
طب قوم ..
قوم شوف رايح فين
ربى يسترطريقك
وينورلك سكتك
روح يابنى ربنا يرعاك
ويحفظلك بيتك
ومراتك وعيالك
وكل حاجة تيجى من ناحيتك
وبوسهملى واحد واحد
بت وواد
ومتنساش حد
بالخصوصي جمال
وماتنساش ياواد
البرد اللى عشش ف الجتة
مستني يطلع منى بِطَلِتَك
وبرضه متنساش ياواد..
الشال

#بقلمى@سيدعبدالغنى عبدالصمد

هى…
====
مطلقة كانت
او ارملة
اوعزباء
اوحتي كانت عذراء
فهى امرأة تهفو اليها
وتشتاق
ايا كانت فهى
ام او اخت
وهي الترياق
فمن انت لتحكم بانها
فاشلة اوسيئة
اولاتطاق
من انت ياايها السيد
أأنت القاضى
والحاكم والجلاد
أأنت بلاذنب
بلاخطيئة
ام أنك فقط
صاحب امجاد
انظر إلى نفسك أولا
فانت مجرد عابر
لاسبيل لك
او مريض لايجد
من يداوى
ومن دونها
لاشئ تساوى
لولاها
فاول ماكنت
كنت ببطنها
ولما جعت رضعتها
ولما بكيت
نمت
على صدرها
ولما احبتك كنت
في قلبها
فاين انت منها
لتحكم
وتنفذ حكم المحكمة
ان كانت لاتصلح
فمالديك
مكان لتعيش فيه
فكل الاماكن ملكها
مطلقة كانت
اوارملة
اوعزباء
اوحتي كانت
عذراء
#بقلمى@سيدعبدالغنى عبدالصمد

الشاعر سيد عبد الغني عبد الصمد قصيدة الاولي والثانيه والثالثه
ديسمبر 04, 2018
الاولة والتانية والتالتة
==============
الاوله ….آه
والتانية..آه
والتالتة..آه
الأَوِلَـــة.. كلمةوليها رنين الجرس
والتانية.. كلمة عليها رجال حرس
والتالتة.. كلمة للى خاف وانخرس

الأَوِلــَة ..
كلمة وليها رنين الجرس ف الحلق متحاشة
والتانية..
كلمة عليها رجال حرس م القصر والباشا
والتالتة..
كلمة للى خاف وانخرس وصبح ديل للباشا
الاولة كلمة وليها رنين الجرس ف الحلق
متحاشة نفسها تطلع
والتانية كلمة عليها رجال حرس م القصر
والباشا وبابها متشمع
والتالتة كلمة للى خاف وانخرس وصبح ديل للباشا عنيه تِدْمَعْ
الاولة آه والتانية آه والتالتة آه
م الكلمة اللى ماليها حول ولاقوة
تطلع تنكتم بالنبوت وبالقوة
ومرار السكات لو تعرف ايه هوه
تقتل السكات ياشعب وتقول بقوه
آه
الكلمة دى اصلها ف المحكمة
عليها يحلفوك
وبره لوقلتها يشنقوك
اصل الكلمة كلمة حق
قوم ياشعب وقول بكل قوة
الاولة آه والتانية آه
والتالتة لاحول ولاقوة
#بقلمى@سيدعبدالغنى عبدالصمد

عن المطر كتبت
==========

قالولي اكتب ع المطر
انا قلت
من عنيكى مطر
وانهمر ع الخد
زاد ف وجد الاحبة
لمانزف ع الارض
وقلت
اعمل انا ف وسط المطر
حبة من حباته
عشان اسيل جواكى
واتعد من محاسيبك
ماهو اصل انا عمرى
ماح اسيبك
ولايوم ح اكون
ف حضن غيرك
#بقلمى@سيدعبدالغنى عبدالصمد

بره وجوه
======

نامت ايديا ع الوتر
والوتر نايم على قلبى
شادد قوسه ..وبيهدد
وانا برضه شادد
وباهدد
اضربه ضربه
يضربنى ضربتين
اصل انا بره
وهو بين الرئتين
قاعد ومادد ايديه
وفارد رجليه
ع الٱخر
وانا مسلم
ماانا بره
وهو بين الرئتين
شايفه وشايفنى
عارفنى وعارفه
وباعافر وياالسنين
اللى عماله تعدى عليا
الوش اصبح حزين
وجلدى كبر عليا
اغنيله يغنيلى
اناجوه بين الرئتين
وانت بره
واللى بره
بره العين
بره القلب
واحب
واتبهدل برضه ف الحب
اصلى بره وهو جوه
بيدندن على الشرايين
شريان ورا شريان
وبيندهنى وقت الادان
قوم اصحى
خلاص بطلنا دندنة
وعاوزين ننام
#بقلمي@سيدعبدالغنى عبدالصمد

الفراق
“””””””””
قالوا زمان ان الفراق
ده ملح الحبايب
وانه اشتياق دايم
للي غايب
بس شوق بحرقة
قلت طب وانا مالى بالفراق
اللي بتقولوا انتوا عليه
ده حبيبي محاوطنى
وانا محاوطه
وحاططنى ف ننى عنيه
وانا حاطه ف قلبى
وتحت بطاطي
وعمرى معاه
لا ح انخ ف يوم
ولا اطاطي
اصل حبيبي ده عزى
وعزالدنيا بحالها
ف عز البرد
بيدفينى
وبعتمة ليله
بيغطينى
وبيحمينى
من ايها شوكة
تشك
حتى ان كانت شوكة ورد
اصله عليا دايما خايف
انى ابعد
او حتى اقرب
دايما حابس
كلمتى عنى
ودايس
ع الشفايف كفه مرة
وع الوش الف مرة
اصله محرم عينى تشوف
غيره
اوتلمح طيف
مش طيفه
ولما الشوق يحدفنى
ويهفف قلبى علي بوسه
انزل انزل وافضل انرل
علشان اوصل خده
وابوسه
وهو عليا مابيبخلش
دايما دايما
هو الاكرم
هو الايد العالية العليا
اللى تمد الخير للدنيا
وان قلتولى
بكره تفارق
زيك زي السابق قبلك
راح اغنىيلكوا واقول
لوجبتولى اللولى ف يدى
وكنوز العالم من تحتى
لاجل ماابيعه وابعد عنه
عمرى ما افارق
عمرى ماافارق
#بقلمى@سيدعبدالغنى عبدالصمد

شوية حاجات ٤
==========
اعذرونى لأنى بحبها
وأعيش أموت ف حبها
لوحتى يوم رفضتنى
ورمتنى بره قلبها
برضه بحبها
****
قد ايه بارتاح انا
لحظة مااشوف بسمتك
لحظة ماألاقى الشوق مسابق خطوتك
ياأم العيون البحر والأرض قدك
رغم إنى بأحس العمر سايبنى وماشى
لسَّانى …. بحبك
رغم انحسار المد
رغم انكسار الحلم
فوق وشوش الناس
لسَّانى قادر أشد عودى وأَلِمْ
وجع الكتابة م الكراس
لكنى لسه ساعتن ماأشوفك
بادوب من همسة
وباقول مواويل ف عنيكى السودة
وباقول ف العيد للأهل
وبعودة
#بقلمى@سيد عبدالغنى عبدالصمد

شوية حاجات٣
==========
حبيبى
قلبى ولا قلبك
ولا قلب الكون ..خراب
دمعى ولا دمعك
ولا كل الكون سراب
باسأل سؤالات كتير
ولافيش رد وجواب
وطريقى الطويل
أخره جراح الوطن
حبيبى
ياللى قلب الشوارع
ونبض الحوارى ليك
سكن
فيك كل شئ م الوطن
ولافيك اى شئ م الوطن
حبيبى
ياللى سامع ندايا
من قبل الزمن
بامد ليك خطاويا
فارد شراع الامل
ف بحر من غير مية
قلبى عشق واترمى
ف حضن التراب مرة
وف حضن الصخر كام مرة
معرفشى العدد
اصلى ماليش ف العد
والحساب
ماليش غير ف الحب
اللى اتعلمته
بنبض القلب
#بقلمى@سيدعبدالغنى عبدالصمد

انتــــى …و …. النيـــل
“!”!”!”!”!”!’!”!”!’!”!”!”!”

إنتى والنيل ..
بتجروا ف عروقى
وَلَّا دمى فيكوا بيسيل
مااعرفش
ملعون ابوك ياجوع
يامعشش ف الضلوع
وساكن ف القلوب
وسادد الودان
وخانق الدموع
ملعون ابوك ياجوع
يااااااه ….. ياه
ياحضنك الضمة
والليل والصحاب
والعشق
واللمة
كل الاوراق ..
مهمة
وسؤال جوايا
بيلح
ايه اللى
فاضل منى
ايه اللى
فاضللى
غير شوية عرق
بملح
ياقلب يامجننى
وٱه يانا
من سحر عنيكى
بالاقيكى
عنقود ممدود
ضامم على صدرى
يدخلنى صوتك
الشفق
ارسم عنيكى
ع الورق
تقفلى شبابيك
زحمتك
وويا الريح والنَفَسْ
يدخلونى
عيونك
امشى
حافظ خطاويا كل
اسفلت الشوارع
وكل الفتارين حافظة
حسرة عيونى
وانا راجع
فاقد الوقت والهوية
#بقلمى@سيدعبدالغنى عبدالصمد

العراق…العراق
ماادراك ماالعراق
بغداد الموصل كربلاء
الباص براس الشارع
نازل
تلاقى صمون وتمن
وكمان كارع
وان قلت يارجال
تلاقى النجف والبصرة
واقفين ينادوا علي
ميسان
ونينوي بلد النبى يونس
وواسط والمثنى وياكركوك
تنادى ابطال مغاوير
من صلاح الدين ودهوك
واهل الفدا والجمال
الديوانية ديالى وكمان اربيل
والنخل ياعم هناك
يرميك بالتمر قسرا
لتعرف العراق
والانبار السليمانية
ذي قار مع القادسية
يشهدوا مع التاريخ
بان منبت العزة
والنشامة العربية
ماولدتهم على مر الزمان
الا العراقية
فما ادراك ماالعراق
#بقلمى@سيدعبدالغنى عبدالصمد

انى أعود
======

انى أُسائل نفسى وعقلى
هل سأعود وفيكى اهيم
أم بالحب سأقتل قلبى
وبينى وبينك حدَ أقيم
هل سأعود اليكى وقلبى
يذكر يوماً حب قديم
إنى بقلبى حقاً اهوى
لكن غيرك قلبى يروم
مامن يوم فيه سأعشق
سوف أعود لذكر قديم
إن الماضى عنى شفيعٌ
إن هواكى الآن عديم
إنى أعود إليكى محال
كيف أعيد حياة هشيم؟!
#بقلمى@سيدعبدالغنى عبدالصمد

شوية حاجات ٢
========
لو صحيح الدم جارى ف العروق
ليه نموت مرتين
جوه الحياه نموت
وبرضه حين نموت
نموت
لوهوانا صحيح مالينا
ليه ملفلف ع الرقابى
ومعشش جوه التابوت
عنكبوت
*******
وبتطلعى من قلب البحر
توصلى للسما
ترقصى مع نور الشمس
تتبدلى قمرة
وتدوبى في نخاع الشوارع
وحين ينتهى حرفك
يِمَيِلْ ع البدن رسمك
*******
وسعت خضرة رقعة عينك
جذبت ليها كل الناس
خلت رقبة مين بيجيلك
تجرى تحضن إيد الفاس
لازم ناخد منك تارنا
لازم نِوْقِفْ خضرة عينك
*******
لازم اغنى ولازم اغني
وٱدى غنايا
******
يافاتح السكة
من يافا على عكا
قاعد على الدكة
وشايف كل الناس
***
مصلوب علي الشجرة
عينك علي القمرة
قابض علي الجمرة
ورافض الاحساس
**
شايلين ف ايد علم
دايسين علي الالم
فاتحين قلب الجبل
طريق لكل الناس
#بقلمى@سيدعبدالغنى عبدالصمد

منحوت ع الخشب
===========
ٱه..و.. ٱه..
ٱه لوتنتفضى..
وتعلنى عن إفلاس شرايينك
ح اغنيلك
ولوتسكتى..
فى زمان الكتابة ع الورق
والنقش ع العجين
ح اموت ف قلب القصيدة
عارى البدن
واندفن
من غير كفن
*****
ٱه ..و..ٱه
ٱه لوتمنحينى
من سكاتك
بركاتك..
وتنحتينى ع الخشب
ومنك اتولد
كأنى نبتة ف أرض بور
گأنى زرعة ف وش ريح
كأنى يوم بيفوت شهور
كأنى عمر وعاش جريح
كأنى ليل
وليل غريب
مخنوق انا
ومحجوب عنى بالرؤية
النهار
مشنوق الحرف جمب الحرف
فوق اللسان
مخنوقة الكلمة
جوه الحلق
قاعدة جريحة
زي السيف نايم ع الرقبة
متحضر يفصلها
ساعتن مايدوى الطلق
ويعلى صوت الدفوف
تدارى الوشوش ف الكفوف
لجلن ماتخبى لحظة خوف
وتزاحم الجسوم بعضها
وتدفع
والكلمة تموت
قبل ماتطلع
وتتغير ملامح الكون
وانتى زى ماإنتى
يامدينتى
قافلة بيبانك عليكى
محلية بالأسوار إيديكى
وساكتة
والصرخة مكتومة جواكى
كماصرخة الوليد
ساعة السقطة
#بقلمى@سيدعبدالغنى عبدالصمد

ختم السلطنة
≠======≠
علمني السلطان اكون..
جلاد
ووشمنى بختم السلطنة
حلم…
للبحور اللي ف عنيك
نفسي أعود تاني ليك
نفسي أحس بأماني بين إيديك
نفسي أقولك
لو للحظة ..
لولكلمة..
لولنظرة
نفسي أقولك
لوبجرة قلم بين عنيك
نفسي أقولك
نفسى أعود تاني ليك
ياشعر الألم والأمان
يانبض العروق
ياعمري اللي كان
نفسي أعود تاني ليك
أكتب وأغني
أحلم تمللي
باللي جاي
للوليد وأم الوليد
للأمان والأمانى
للأرض وللشهيد
نفسي أعيش تاني فيك
حلم…..
للناس الغلابة
حتي ف بلاد السوارس
هجانة واقفين ع الحدود
ينادوا كل دايس
ع الأرض إياك تفوت
حتي ف بلاد الأماني والأمل
الضحكة..فوق شفة عروسة متحني كعبها …. دبلانة
وٱه يانى
لساني داير ف البلاد
شايل سلالي الفارغة
فوق صواني الأحلام
والكلام…
مخنوق ف حلقي من زمان الموات
ومقلوبة هندسة الحروف
ودابحها السكات
حلم ….
للجراح اللي ساكنة ف البدن
كما ريح المدينة الكاسر
بألمحك ياشعاع الشمس الآتي
عارف اني عارفك من زمن
ودارس تفاصيل إنكساراتك
ف البدن
لكني للآن أجهلك
يافؤادي الشجن
ياإنكسارى جوه مخروط البدن
والهياكل الغريبة
قربت علي حدود الشيبة
ياهلتري ح تقولي أقف
ولا ح أكمل المسيرة
#بقلمى@سيدعبدالغنى عبدالصمد

خط طول وخط عرض
≠============≠

ولاكان فيه بينا ميعاد
ولاحتى سابق معرفة
لكن جمعتنا بلاد
من غير كلام
من غير معانى
ولا فلسفة
عشاق وترحيلة
وكراسى شوق
وراديو وقهوة
ونرجيلة
ياحبك التقوى والغفران
ياااه … ياحلمك الحيلة
ياحبك الريقة والسلسال
ياعشقك اللى سَكِِّن الموال
شمسك غريبة
وضلك والحقيقة
كل شئ فيكى غريب
يامصر يامه ياعتيقة
ياللى حضنك اصبح كئيب
((اعطنى الناى وغنى
فالغنا سر الوجود
وانين الناى يبقى
بعدان يفنى الوجود))
بينى وبينك يادوب
خط طول وخط عرض
وكان حنين كل واحد مننا لارض
كان حنين لبلاد ملاها نور
والطيور
فيها غنت فوق الشجر
للِّي ع الطريق ح يمر
والمر
كاس وشاربه من زمان ف حضنها
وعيونها قاتلانى
ودابحنى فيها الذل
لكِنِّي مريت
عديت
لبلاد فيها التقيت
بيكي
ولقيت اني
كنت مدفوع لاجلن الاقيكي
على حد التماس
بين خط طول وخط عرض
وبقينا صحاب ياصحاب
يجمعنا مع بعض الهم
وتفرقنا لمبة باب
وشباك على طول المدي
مفتوح راسم خيال
بين الحوارى والشوارع
بينى وبين نفسى
مابين صد ورد
يرسمنى تاني
علي خط طول وخط عرض
#بقلمى@سيدعبدالغنى عبدالصمد