عبدالرحمن الأبنودي .البدل

البدل

مرثيه لجمال عبد الناصر

أبادْلكُم حرّية .. بسجن.

أبادلكم سِلْم .. بحرب.

أبادلكم صوتى .. بصمت.

أبادلكم اسمى .. بصوت مجهول.

أبادلكم فدادين الطين

بالعتمة فى رطوبة الزنازين.

أبادلكم حاكم عادل بالفرعون الجبار.

الجنّة .. بالنار.

الراحة .. بتعب القلب.

أبادلكم أمن .. بخوف.

زُهرّية ورْد .. بكباية دم.

وحياة مرتاحة أبادلها بموت.

أبادلكم ضِحكاتى .. بغمّ

ورفيقى أبادله بمخبر كلب.

أبادلكم لو كنتوا تبادلونى

تاخدوا سنواتكم وتردُّولى السنوات.

صعب تردُّولى السنوات .

صعب تبادلونى برجوع العزة

ومعنى الوطنية والأوطان ..

للشعب.

ورجوع دمّ الشهداء.

والوجه الأصلى لكلمة أعداء.

ونضارة وجْه الفقراء.

وكرامة تساوى كرامة كلّ اللى اتسلبوا.

والنصر .. لكل اللى من غير حرب

اتغلبوا

بادْلونى .. وجوه بوجوه

ولغات بلغات.

خدوا كل اللى حيلتنا من ألوفات:

اللى اتنهبوا .. واللى لسه حيتنهبوا

وردوا للأمة رجولتها ونخوتها وقُدرتها.

ردُّوها من تابع مذلول

لزعيمة لاستقلال.

من قُطعان سايحة .. لرجال.

ردولها كل اللى سرقتوه من مال.

ادفعوا عنْها ديون الأطفال.

ردوا لها شمس المستقبل

واكنسوا أطنان العتمة من درب الأجيال.

أخلاق الشعب اللى انداس ..

واللى أصبح ناس مش ناس

ردوا للشعب رغيفُه المخطوف.

صوته الأصلى وعرقه المسفُوف.

وبالمجّانى .. رجعوا للطفل الكراس.

ابنوا على شط النيل المصنع جنب المصنع.

رُدوا للجندى المصرى وظيفة المدفع.

ردُّوا الإنسان العادى ياخُدْ قيمةْ ما يدفع.

والفلاح ردوه من ذُل الغربة

وردوله حُبه للفاس.

رُدوا الوطن المسروق

اللى اتمرغ فى مخالب السوق.

فكوا عنه الطوق.

شِلُّوا القدم الصهيونية الساكنة فى الدقى

وماشية فى باب اللوق.

ردُّوا الجمعية للفلاحين

والمصنع للعمال.

لو تقدروا تخرجوا مِ الأغلال

اللى كتفكم بيها اللى علمكم لعبة رأس المال ..

لو غيرتوا الحال ..

أُقسم قدام شعبى أغنى لكم من قلبى

وعمرى ما غنى تانى

لـ .. (جمال)

» عبدالرحمن الأبنودي . سيد طه
» عبدالرحمن الأبنودي . ياعنكبوتة
» عبدالرحمن الأبنودي . يامنه
» عبدالرحمن الأبنودي .بغداد
» عبدالرحمن الأبنودي . المتهم