سيرة ذاتية الشاعر محمد دسوقي

محمد حسن دسوقي
شاعر مصري من مواليد القاهرة عام 1970

حاصل علي ليسانس اداب قسم فلسفة من جامعة القاهرة بتقدير جيد
اكتب شعر العامية و الفصحي
لي ديوان بالشعر العامية اسمه ( أنا مسافر ) تم نشره عام 2014
انشر بجريدة الراي الكويتية اشعار فصحي
واقوم ببعض الدراسات في النقد الادبي والفني

اهلا وسهلا بحضراتكم
مع وافر الشكر والتقدير

يا صبية
(1)
يا صَبيهْ
لما تسْمَعِي صرخة الليل الحزينْ
بيندهك
هي ديت صرختي
لما تشوفي بين جفون العمر دمعة
هي برضه دمعتي
ازرعيها ....وأقطفيها
جوه بستان الاغاني
لملميها واحفظيها
بين خزاين وحدتي

(2)
يا صبية
أنا كنت عايش
عايش عشان عاوز ما اعش
والتقيت الدنيا غش
النجم حتي النجم
كنت بلقا فيه ديابا
وفيه غزالة بتترعش
وغنوة الامل اللي كانت لينا عش
يرموها جوه الحزن .. تطرا و تنكمش
وغنوة اليأس نلاقيها
وليها لازمن نسمع
ولما قلنا ما نستمعش
كان العمر لينا ......نعش
(3)
والتقيتك
موج بيعلا وينهبط
ومعاكي بطلع
بس برجع اتخبط
وأتريكي ..
ذي الدنيا بتاكل في البشر
اللي يعيش فيها الحجر
واللي غيره يندثر
اتريكي ..
ذي الدنيا المتلونه
بالمحبة متزينه
من بره الشكل يزرع جوه قلبي سوسنه
ومن جوه
النار بتاكل فيا أنا
اه ياللي مت فيكي أنا
ومت منك برضه أنا
(4)
يا صبية........ بسألك
النار بتاكل كل شئ
حتي بتاكل جلدها
والخوف جزيرة قرصنة
والرصيف يمشينا
لما بتنقلب الازمنه
اذاي دا يحصل
يحصل دا كله لما
نلقي عضمنا شوية ورق
واما
دمانا بتندلق
ع الارصفه
نعمل من الضلمة لحفه
نتغطا بيها في الربيع
وف الشتا ما يهمناش
نصقع لحد ما ننكمش
وبعد لحظة نتحرق

(5)
اه يا صبية
البرتقالة اتقطعت اربع ارباع
الاولاني كان للسباع
التاني كان حق الضياع
التالت فدية لعمرنا
الرابع؟
والرابع دورنا عليه ما لقناه
مع انه هو حقنا
اتاريه من بختنا
البرتقالة اتقطعت
تلات ارباع والباقي ضاع

(6)
وفي الختام
لما اقولك اني ماشي في الزمن
رافع حياتي بين كفوفي
ابقي نادي مره طيفي
ع الطريق يسبق ساعات المستحيل
اوعي تخافي
اوعي تخافي
اوعي تخافي