الشاعر حسن توفيق عبد المطلب .مصر

الشاعر حسن توفيق عبد المطلب
. مصر . قويسنا . المنوفية
موجه بالتربية والتعليم
خطاط ورسام وشاعر عامية
له ديوان منشور وموجود بالمكتبات بعنوان ( مين علمك )
وديوان تحت الطبع
عضو عامل فى نادى أدب قويسنا
عضو فى معظم المنتديات الأدبية
حصلت على العديد من الجوائز فى المسابقات الأدبية
نماذج من أعماله
........ مين علمك .......
مين علمك يا.. ولد
الرسم بالكلمات
وخلى قلبك يقول ..
أجمل الحكايات
الحرف ده فى رسمتك
دايما يقول الله
والعزف عاشق صنعتك
ونبض الشوق وياه
أدوانك بسيطة ..
أصلها مصرية
السطر ماشى مستقيم
حتى ع البردية
مين علمك ياولد
فن الشعر والزجل
عمال تلون أحزان
وتطلب الأفراح
بتحلم والحلم ينساك
وتحلم من جديد
بكره يطلع نهارك
لحظة صلاة العيد
-----------------------
.... فى حب مصر ......
قالولى بتحب مصر
قولت مش عارف أد إيه
أقول باحبك ..
الحب ده مش كفاية
أقول عشقتك ..
عشقى مالوش نهاية
أزعل منك ساعات ..
وتبقى حكاية
أجرى على نيلك ..
والدموع جوايا
ألقى الشط بيطبطب
على كل جروحى
تضحكى .. تبكى
وتسعدى هوايا
أقرب خطوة ..
تقربى خطوتين
تنور العتمة ..
أصل انتى نور العين
ف الفرح سهرانة ..
بتفرحى معايا
وف عز الجرح ..
ألقى ودك سر دوايا
أقول عنك إيه ولا إيه
يابلدى
إنتى حاسة بكل نبصة
فى ضلوعى
مهما قولت من كلام ..
أو شوفت كل الآلام
أنا إبنك وانتى أمى ..
وكل همى
إزرعى دهبك ..
وقت الحصاد ضمى
إروينى من سلسبيلك ..
شهد مكرر
إعلى بينا لفوق ..
ياللى وردك متعطر
-----------------------
........ ذكريات .........
ماشى ..
وسايب لى حبة حاجات
كل شىء بعد قلبك ..
لون الجراح
الدمع نازل يجرى ..
من قلبى
وابكى غصب عنى ..
فى ليلة نواح
سامعة ألحان من الآهات ..
فى جنبى
الصورة مش حلوة ..
والصوت صراخ
إنت والأيام نار ..
ساكنة ضلعى
وذكرى عايشة ..
جوا نبض الصباح
جاى الليل يبكى ..
عتمة أيامى
وراح يشكى منى ..
ومن غدر الزمان
ليه تظلم قلب حبك ..
ياأنانى
سايب لى أحلى أوحاع ..
حياتى
كلمة ذكرة وغنوة عزف ..
ع الكمان
سايب لى طعم المر ..
فى مماتى
وغصن الفرع ..
ماطال الشوق والحنان
-------------------------
........... رباعيات .............
ياعم ياللى عمال تشيل فى الهموم
والحزن عندك بقا سحب م الغيوم
إرفع إيدبك للسما وقول يارب
تلقى باب الفرج مفتوح ع العموم
.------------------------
.... الورد والشوك....
قال الشوك للورد إزاى عايش فى سلام
ونا ع المر عايش عمال أحصد ملام
رد الورد إل فى قلبى على لسانى
إللى يجرح الفل لازم يشوف آلام
-------------------------
....... إللى بنى مصر ...........
إللى بنى مصر كان ف الأصل أسطورة
لا قدها حد ولا قد الصورة
فيها كل شىء منحوت بإحساس فنان
فى عز المحن تلقاها مستورة
------------------------
....... تعب الجدع ......
ياشمس شوفى الجدع باين عليه تعبان
قالت سيبوه .. دا عضمه حجر صوان
إيه تعمل الريح فيك ياجبل الصبر
الكل عارف إنك واخد على الأحزان
------------------------
مركب وماشى على أمواج الهوا
يقول الخشب آه .. الملح أصبح دوا
المال يشترى أرض مليانة بالكنوز
ماتطرح ثمار إلا من دم النوى
------------------------
........... ناس وناس .........
فيه ناس تعيش للبنا
وواخدة الحياة جد
وناس تموت فى الهدد
وتتشد للخراب شد
إللى بنى شاف هنا
واللى هد سقط فى بير
واحد وعاش ع الأنا
والتانى مدهون بالجير

» الشاعر حسن عبد المنعم رفاعي - مصر
» الشاعر عبد الرحمن الأبنودي . مصر
» الشاعر عبد الرحمن الأبنودي . مصر
» الشاعر رمضان عبد الصمد بر . مصر
» الشاعر وائل المرسي عوض . مصر