الندالة ( أحمد فؤاد نجم )

الندالة ( أحمد فؤاد نجم )
--------------
يا كارتر يا ندل

حبيبك وصاحبك

وصاحب مراتك

وتبقي انت صاحبه

وصاحب مراته

وكان والده ايضا

مصاحب حماتك

وكان برضه والدك

مصاحب حماته

وطول عمره نافد

على استخباراتك

وشغال جاسوسك

على استخباراته

وقاعد يزود

رصيد ملياراتك

وسارق

وشايل معاك ملياراته

وراجل مامنك

وخاين ضميره

وخايف

وحاطط ف ايدك مصيره

ودابح ف بحبك

الوف الضحايا

ودايس ف طين الدنس

والخطايا

يقوم لما يطبق عليه المحيط

تطنش يا كارتر

وتعمل عبيط

وتخلع

وتنسي الحمار والغبيط

وتاكل عيالك

بدون وجه عدل

صحيح

انت ندل

» شقع بقع ( أحمد فؤاد نجم )
» نيكسون جاء ( أحمد فؤاد نجم )
» استغماية ( أحمد فؤاد نجم )
» الأخلاق ( أحمد فؤاد نجم )
» شيد قصورك ( أحمد فؤاد نجم )