الشاعر سيدعبد الغنى عبد الصمد - الجـنسية مصري

جازف٠٠٠٠
======
٠٠٠٠ اهداء الى ((الصديق الغائب الحاضر
الشاعر محمود درويش))

جازف
قالوا جازف
لاتنسي بان الجرح الغائر
لابد ونازف
لاتلقى بالا للاقوال
لاتملأ رأسك المخاوف
فالحب …
اليوم الامس الغد
كالجزائر
حين يعانقها المد
والآن
الآن ولابد
ان تضع الحد
*****
خائف
قلت بانى خائف
قالوا
جازف
لابد وان تحنى الرأس
فى وجه الريح
لايكسر الا ماكان صحيح
قلت وإن مت
اتقيموا ضريح؟؟!!
أيزور الناس من كان يقول
الحب ضمير غائب
لايكسب الا الغالب
من يأتى بالقدر اللازم
يملك هذا القلب ؟؟؟!!
#بقلمى@سيدعبدالغنى عبدالصمد

عودى بربك
=======
مذ فارقتى بات سلاماً
بينى ونفسى جد قطيع
كنتى تنادى نداكى ألبى
كنتى تقولى وقلبى يطيع
كنتى تقولى فأسمع منكى
كنتُ إليك خير سميع
كنتُ حبيباً كنتُ صديقاً
كنتى تَوَدى طفل رضيع
هلا علمتى الآن بحبى
وتعلمتى كيف يضيع
لاكن جئتى بوقتٍ خاطئ
جئتى وقلبى الآن صريع
جئتى تقولى بأنى أخشى
كيف صريعاً يخشى صريع
كيف تريدى منى أحبك
كيف شتاءً يلقى ربيع
ذقتُ بهجرك هماً أضحى
داخل قلبى هَولَ مريع
كيف أصارع نفسى وقلبى
كيف أُهَدِم حصن منيع
إنى أحبكَ هكذا قلتى
فهل تسدين إلىَّ صنيع
عودى بربك كيفما جئتى
عَلَّ الزمنُ الحبَ يُضيع
#بقلمى@سيدعبدالغنى عبدالصمد

بسم الله

سَمِّى معايا ويللا نعدى
إيدك هاتها وإمسك يدى
نبدأ تانى
خطوة جديدة
ثابتة وهادية
جريئة عنيدة
يدك مع يدى
نجرى نهدى
يللا نغنى غنوة لبلدى

خللى ديانتك هى ديانتك
زى ديانتى ماهى ديانتى
لاتغير إسمك ولاإسمى
خللى سفينتك هى سفينتى
لجل عيونها راح نتوحد
نبقى أنا وإنت جدار المعبد
نتجمد
نصبح أقوى من الصوان
ونرد السهم ف قلب الرامى
ونقطع كل جسور بتودى
على أرضه
ومن أرضه تجيب على ارضى
ونعللى كل رايات النصر
لمانحقق حلمى وحلمك
كل غرامك ويا غرامى
ونعلى راية الانسان
#بقلمى@سيدعبدالغنى عبدالصمد

الحب
====
لاتحســــبن الحــب ينســــاب مـــــنك انســـــيابا
أو انك أنت مــن طلــــبته وفي لمحـــةٍ اســـتجابا
إنما يأتيـــك بغــــتة كأنما هـــو المـــوت المـــهابا
فاعلم مكانك منه ولا تبتعد واقترب منه اقــــترابا
فقدرك معلوم عند ربك وفي عنقك معلق كــــتابا
وأجلك ٱت لا محالة فاغتنمه من الحياة الصوابا
واصبر حتى يعينك عليه الله فتلقى أجر صبرك يوم الحسابا
فعلى الله التوكل كله هو الخالق ومقدر الأسبابا
وإن كان منه إبتلاءً فمعه رحمة تخفف عنك العذابا
فيكون لك منه مغفـــرة وعفـــوا وقـــربا تزدك منه استحبابا
بقلمي@سيدعبدالغني عبدالصمد
جمهورية مصر العربية

من انت
=====
ساعات العمر تمر بي وقد مللت الإنتظار
لاادري أأنظر أنا إليها أم تنظر إليَّ هيَّ السماء
وقلبي الذي يهواك يتحين
معي ساعة اللقاء
وفجأة وكانما سمعت اذنايَّ صوتا في الهواء
سرت في الآفاق نَسْمَةٌ حسِبتُها
من عطرأنفاسك تَنَسَّمْها الهواء
منمقة الإحساس بديعُهُ أنت للجمال رونقه وكذلك البهاء
فيالحسنك ويا وجع الزمان من معسول الكلام عنداللقاء
أبوح بحبي لغيمة ممطرة
علهاتُبْلِغُهُ عند إنهمار الماء
وأحفظ وُدِّي لمحبوبٍ هو
عنديَّ الداءُ والدواء
وتنام قرير العين هادئ البال
والقلب يبيت معتصره الرجاء
عسي ترحمه يوما وينال منك
الرضا أولعلك تسمع له نداء
وتنصت لدقات في قلبك كانت
له تدق كلما راح عنك أوجاء
فيا حبيباً منه الداء والدواء
ترفق بقلبٍ تَعَنَّىَٰ بكَ أيُّماعناء
وطال الصبر به وفاق أيوب في صبره وسما بغير سماء
ونحا به الزمان فأعياه أيُما إعياء
وعاش للحب والهوى والعشق
فضاع منه عمره هباء
وأشاح الشباب عنه بوجهه والتفت إليه المشيب وجاء
فيا حسناً ليس له مثيلٌ هل جزاء الحب عندك جفاء
ام انك لست من أهل الارض
وكذا لست من أهل السماء
أأنت نبتة أتت من مكان سحيق أم أنك كالعنقاء
ولست أراك إنما أرى طيفاً
لايُمْسَكُ مَثَلُكَ كمثل الهواء
بقلمي@سيدعبدالغني عبدالصمد
جمهوريةمصرالعربية

المجاهدة
========
ولها فوق الرؤوس كرامة
وتاجها العز فوق السحابا
وعند الله لها حسن الجزاء
وشكر كل من جاء اوغابا
فليس منا من ينكر فضلها
اويضن عليها اعجابا
فهي النبيلة المجاهدة
ونحن لها اخوة واحبابا
ومن منا ليس يوقرها
فله منا البعد والاغترابا
بقلمي@سيدعبدالغني عبد الصمد
جمهوريةمصرالعربية

دنيا الحب
=======
دنيا الحب ياموعودة
وفيكِ الاحباب الوان
الفرقة ليه موجودة
عايشة جوه الإنسان
الهجر فيكِ بيتوجد
والحب بتضيع قدرته
والقلب معاكِ بيتولد
فارد شراع محبته
يللا نقول من جوه القلب
مفيش أحلى من دنيا الحب
يللا نخللي الدنيا تحب
وترقص على انغام الحب
دنيا الحب دي جنة
عايشة جوه وجدانا
لوعشنا معاها ايامنا
الحزن يسيبنا ف حالنا
يللا نحب بسرعة
ونغني أغاني الحب
ده العمر بيجري بسرعة
بقلوبنا يللا نحب

مع السلامة
========
باي باي مع السلامة
ياحبيبي وإبقى قابلني
لا ح أقولك تاني تعالى
ولاحتى كمان كلمني
**
راح أطفي ناري بإيدي
وح الغي معاك مواعيدي
وأقول لفُرقتي زيدي
وح أقولك الف سلامة
**
مش ح أبكي انا تاني عليك
ولا ح ٱجي أترجي عنيك
ولا أقولك حرام عليك
راح أقولك ألف سلامة
**
انا ح أنسى هواك إنساني
وإنسى زماني وعنواني
وإن جيت يوم تترجاني
راح أقولك الف سلامة
باي باي مع السلامة
بقلمي@سيدعبدالغني عبدالصمد
جمهوريةمصرالعربية

فلسطينى
=======
فلسطينى..
كماأمى… كما الأحزان
كما طيرى ف المنفىٰ
كما الاوطان

فلسطينى
كما زرعى…. كما شجرى
كما زيتونى
كما عصفورى بيغنى
فلسطينى

فلسطينى..
وح أبقى طلقة المدفع
وح أبقى بارود..
وتسدى بيَّا ها الموقع
وتمحى بيَّا كل حدود

فلسطينى..
ومهما إغتصبوا شرايينى
ومهما داسوا حطينى

فلسطينى..
وح تفضل قبضتى قابضة
على حجرى…
على جرحى..
على النبضة
وأرضى حِبلىٰ بجنينى
فلسطينى

#بقلمى@سيدعبدالغنى عبدالصمد
جمهوريةمصرالعربية

دولتنا…..
========
لسه المشوار طويل
ياعم حسن
الايام مابين الناس
زي ماربنا قال
لساها دول
وكل الدول
ح تموت
وتروح
والكل قد فطن
ان دولتنا هي اللي باقية
والباقي ح يصيبه العفن
اصل دولتنا دايما
متجددة
وبتولد كل يوم
مليون ولد
اصلها متبغددة
والكل بيحبها
وبيعشق جمالها
وكلامها
وزواقها
وترتيلها
وزعابيب امشيرها
وصرخة الولادة
اللي فيها
وآهة الولد
وحبها ف القلوب كلها
معشش
حد مايحبش
دولة الشعر
ياعم حسن
#بقلمى@سيدعبدالغنى عبدالصمد
جمهوريةمصرالعربية

أمـــــــــــــــي
========
الله عليكِ ياأمــــي
ياضحكي ودمــعي
وفرحتي وهمـــــي
أجمل مافي الكون أمي
والكون كله يهـــون
عشانك ياأمــــــــي
وأدِّيِكِ مــن عمــري
ولاعمـــري يكــــون
من غيرك ياأمـــــي
ده اناسنيني وأيامي
وطفولتي وشبابـــي
ومنايا وأحلامــــــي
كلهم انتِ ياأمـــــــي
ياتاج راسي وحراسي
وملاك عمري ياإحساسي
بحبك من ساسي ولراسي
ودايب فيك ياأمي
تشاوريلي اناجيلك
ماانا ليكي
انا نهارك وانا ليلك
احب فيكِ وتحبيني
احضنك
والدنيا تحضني لما
تحضنيني
وحشتيني
بقالي زمان ماسمعتكيش
تناديني
ياواد
تعالى إفتح الباب
نَزِّلْ عني حِمْلي
وشيل هموم سنيني
كبرت ياواد خلاص
وبقالك ست وبيت
بس لسه برضه عندي
ماكبرتش بس عليت
وغلاوتك زادت
الله ياأمي على عتابك
بس خللي بالك
انا مهما كبرت وعليت
ف الدنيا بين الناس
انا برضه حبيبك
وخدي ليكِ مداس
بقلمي@سيدعبدالغني عبدالصمد
جمهوريةمصرالعربية

الغيرة
=====
الغيرة بسَبَبَكْ وبسَبَبِكْ
عشان انت أوهيَّ اللي بتبدأ
بتميز عيل عن عيل
وبتيجي ف الٱخر تزعل
تقعد تولول وتْنَوَح
وتقول قِلِتْهُم كات أريح
الواد من أخوه بيغير
والبنت كمان غيرانة
إن جبت لواحد لعباية
التاني يبحلق ويبص
والبنت ان جبتلها عباية
اخوتها تقعد تتنطط
وع العباية تجري تشخبط
على إيه تشتكي وتصوت
ما انت اللي عملت كده
ف نفسك
فرقت مابينهم م الأول
معإن نبينا وصانا
مانفرقش مابينهم
حتى ف البوسة
والحضن للكل يساع
ولافيش أحسن م العدل
عشان الكل يبات مرتاح
بقلمي@سيدعبدالغني عبدالصمد
جمهوريةمصرالعربية

دامت لمين
========
هاتلي حد مننا علي وشها
مش ح يبقى ف بطنها
بعد ميت سنة
ماتلاقيش
أصل كل وقت وله أدان
وكل طير
وليه جناحين
عشان يطير
وكل حي وليه
لقمة ونفس
علشان يعيش
فماتفكرش
إنك مخلد
دامت لمين
عشان انت..
تعيش
كانت دامت لنبينا
محمد
خير الأنام
وانت جمبه ..
ماتساويش
إسمعها مني
وحطها ف ودانك
حلق
اللي زيك إتخلق
عشان يموت
مش عشان إنك جميل
أوسعادتك طاووس بريش
الحكاية كلها هنا
إختبار
ياتعدي منه
ياماتعديش
فإختار لنفسك قرار
ح تعيش هنا بالحسنى
وهناك تنام ف الجنة
ع الريش
أوتخليك هنا جبار
وتروح هناك ف قلب النار
تعيش
حطها ف ودانك حلق
وأما أشده عشان أفكرك
ماتقوليش
ماتشدنيش
بقلمي@سيدعبدالغني عبدالصمد
جمهوريةمصرالعربية

كلمة مش جرح
==========
جميل..
لما تغني ونسمع صوتك
ياللي بتكتب شعر
عشان الطرح
والاجمل منه انه يبين احساسك
بين فرح وترح
وكمان الاجمل
لمانعيشه معاك اوقات
ساعة ماتدوس بكلامك
ع الجرح
او يعلا صوتنا بزغرودة وياك
ف الفرح
بس ح اقولك
كلمة وفكرة
مش كلمة جرح
لازم تثبت على حاجة
مش عمال تتمرجح
وتمرجحنا جوه قصيدة
تعمل يخني
واحنا علينا
نمد ايدينا
وناكل
بس
لا ياعنيا وضيِّ عنيا
خلي إدامك واحد
مش فصحى وعامية
خليك زي النخلة
ثابت ف الطرح
ده انت معداوي
بالشعر وبالمغنى
وشارح للواقع
بالقافية وباللازمة
فهمت كلامي
والمغزى
ولَّا زعلت ف شيِّ
خليها ف دماغك
فكرة… لبكره
عشان الجَيِّ
بقلمي@سيدعبدالغني عبدالصمد

لا للإرهاب
======
ح نقول إرهاب
وقرف وعذاب
أصله مش إرهاب
أصله دولة
واخداه مقاولة
وشغالة بيه ع البلاد
إشي تمويل
وإشي تحويل
وإشي تجنيد
وغسيل مخ
وإحنا علينا التنديد
وعيالنا يموتوا عشانهم
واحنا نتعلق ع المرجيحة
إرهاب من بره
من جوه
أهو ف الاخر
يبقى طريحة
وواخدينها
غصبٍ عن عينا
ومالوش غير هي
طريقة
علشان نخلص منه ومنهم
نقوم قومة واحدة
هوجة واحدة
ونقتلهم
يلعن………
بقلمي@سيدعبدالغني عبدالصمد
جمهوريةمصرالعربية

من فات قديمه تاه
===========

من فات قديمه تاه
كلمة قالوها اللي قبلينا
لافكروا ساعتها ف مال ولاجاه
فكرهم كان الخيرلينا
**
وكنا بنزعل ونتضايق
ونقول كلام ونتخانق
ونعلي صوتنا
ونسيب بيتنا
ونْهِجٍ وسط الخلايق
**
ونسمع صوت من بعيد ينادي
ياولدي إهدىٰ
تعالىٰ
بكره الامور ح تتعالج
بس دِلْوَك
خلينا نِدَّارى جوه الخلايق
**
نمشي حتي مانبصش
ونْمِدْ الخطوة
ماتْمِدِّش
يحَجَّر الصوت المدبوح
خطاوينا
يشل تفكيرنا
يخلينا
نطل ع الطريق
طلة
ونرجع تاني
نِتْمَدِد
على الأسفلت
مابين الآهة والآه
***
من فات قديمه تاه
والزمن لساه
عايش فينا بريحته
معشش ف التلابيب
ولامليون ألف بيب
ح تِطَلَّعُه
**
بص ياولدي
الإنسان بقناعته مش مطمعه
كنا زمان
بتلمنا لمبة جاز
ناكل ونلعب
ونذاكر ونتخانق
وأما يخلص الجاز
نحضن بعضينا
وننام
أو لمانزهق
برضه نطفيها
وننام
يعني كنا عيلة واحدة
إيد ف إيد
إنما دِلْوَكْ
كُلُّكُوا عفاريت
بالنهار نايمين
وف الليل صاحيين
كما الوطاويط
ماعادش عنديكم عزيز
لا أخو ولاصاحب
لاحبيب ولاصديق
***
وأنا ياولدي ماعنديش
غير يادوب
طبلية ولمبة جاز
وفَرّشَة وقُلة
وبَسْتِلة
وفرن حيطان
وجلبيتين دَبَلان
وشوية دقيق لزوم العيش
وإنت ياضنايا
حِدَايَّا
غير كده مايلزمنيش
فأصبر معايّ ع العيشة
لحد ماأرَوَّح
أو روح بيع حتة طين
بس نصيحة
حاجات الايام دي
مالهاش عوزة
كلها كدب
وهيصة
والأبقىَٰ لك
حتة طين
#بقلمي_وأفتخر@سيدعبدالغني عبدالصمد

اذا سمحتولي ممكن برضه ولكسر الملل
ارد بفانتازيا عبيطة شوية

دايما كده
عاملين مشكلة
لاف يوم يتفقوا
ولامره يتحدوا
والمشكلة صبحت
معضلة
خلاص مليت منهم
وزهقت
وقلت ابعد عنهم
اتبرأ منهم
وكتير حاولت
بس خسرت
مش عارف
الحكاية فيها ايه
قالوا يمكن مولودين
فوق رؤوس بعض
او يمكن يكونوا
ولاد سبعة
ومابياخدوش على بعض
مش عارف
اللي انا عارفه كويس
ودايما حاسس بيه
انهم ابدا ابدا
عمرهم ماح يتفقوا
مع بعض
طيب اعمل ايه دلوني
امشي واسيبهم
ح يقولوا
مجنون ف الشارع ماشي
قالع راسه
استنى معاهم
ح يقولوا
عبيط ومهاود علشانهم
باع اهله وناسه
حد يقوللي
حد يفيدني
اعمل ايه
وايه الحل
مع قلبي وعقلي
واحد جنني
والتاني سابني
ورحل

بقلمي@سيدعبدالغني عبدالصمد

شتاء بلا شتاء
========

لا تلقي بالاً للأشياء
فالكل هباء
لاتجعل قلبك يتحرك
يتحسس احلاماً صارت أبخرةً
أوأياماً ولت جدباء
فالحب ..الكره
حتماً سيموت
فالكل هباء
**
لاتنسى أن تكتب إسمك
بين الأسماء
والأفضل أن تكتب العنوان
فأنا اتبعثر بين الأسماء
وذاكرتى باتت كذاكرة
الصبيان
فاعذرني..
فالكل عندي هباء
***
ياقلباً لا يحمل إلا الهَمِ
لاتجعل هَمُكَ حملي
فالهَمُ عَنَاء
وأتركني أُبحِر ثانيةً
فماعُدتُ أملكُ أسلحةً
تحميني من أي
شتاء
فَجُلَ أجزائي تلاشت
مني وضاعت
ما بين شتاءٍ وشتاء
****
أصدقني القول
أأحببتني يوماً
أم أنك لم تلق لي بالاً
وأهملتني كباقي الأشياء
*****
إني مرتحلٌ مرتحلٌ
تاركاً ورائي
أيام شتاءٍ قد عبرتني
وخَرَجَتْ مني
مِثْلَك
ولكني
أُوصِيك وصية
إن مر عليك أي شتاء
وصادف أن سائل عني
قل جاء شتاءً
ومات شتاءْ
#بقلمي_وأفتخر@سيدعبدالغني عبدالصمد

شوية حاجات

يامصر
ياللي حبك سبانى
وخد منى قلبى ووجدانى
حطيت مكان قلبى ..قلب
تانى
لجلن يساعك
لكنه مافاد بشئ وزود لى
احزانى
********
شفت البلح
ع النخل استوى
قلبى هوى
الوصول للمستحيل
شافك البلح
على صدرك هوى
ووصل قبلى للمستحيل
********
ياحبيبى الدنيا ليل
والليل هويس
ولافيش ونيس
وانا… جوه قلب الليل
همى شايلنى لفوق
ومن بعيد شايف شروق
ياهلترى ح اوصل اليك
ولاح اغرق ف الطريق
*******
ليه ياطريقى
بتختلف عن كل الطرق
ليه ياحبيبى
عنى دايماً تفترق
ليه ياقلبى
جواك دايماً بتكتم
لما خلاص ح اتخنق
*******
الناس بتهوي ايه السكوت
وتموت
تخاف م القمر
ياعيون بتخلق فيا صوت
غير النصيب والقدر
ح افضل هنا…
انا الوليد
وشمسى راح تطلع على
يوم جديد
#بقلمى@سيدعبدالغنى عبدالصمد

عــــــراف
======
عراف حارتنا لساه بيكتب بالخضار
فوق البيبان
والحيطان
وينقط الحروف بلون السما
كان حزين انما
عارف انه من زمان
كان بيستنى ف الصبح
ناس تعدى على بابه
شايلة عيدان القمح
بلون وشوشها الطيبين
كان وكان
مع انه حزين
يفَرَّح كل القلوب حواليه
ويسعد الصغير قبل الكبير
كان فقير
كان عمنا العراف
عراف حارتنا
ايديه سخية
يزرع بيها
يقلع بيها
واللى ف ايده
دايماً مش ليه
كان بيزرع
لجل لقمة هنية
لبهية
وبهية اصلها بنت اخته
يعنى مش بنته
كانت تعبانة م الشقا والغلب
وحازز جوه قلبها عمرها
اللى مالوش عند حد حساب
لكنها كانت
اجمل بنات حارتنا
كانت نوارة
وسط البشر الناشف
وشيوخ بعمامة
كانت نوارة
تحكى لخالها
خالها العراف
عن ديب وديابة ومابينهم معزة
وكان ياماكان
وحاجات كتير تانية
وعن حالها واحوالها
وفجأة ضاعت احلامها
لما ف وسط نهارها
شافت خالها
العراف
متشال فوق الكتاف
حز ف قلبها وجع السنين
وقالت
هبوا وانجدوا بهية
هبوا وانجدوا بهية
#بقلمى@سيدعبدالغنى عبدالصمد

حلم الوليد
=======

ويضيع منى عنوان البيت
تضيع منى سكة الشارع
تصدمنى حكاوى عجوز
يقتلنى الحلم الطالع
من ضحكة فوق شفايف
طفل برئ
فاكر ان الدنيا بتاعته
بحق وحقيق
وارتاح لحظة مااشوف
ف عنيها
الحلم عاش
وعاد وليد اخضر
يزهر شمس ايامنا
#بقلمى@سيدعبدالغنى عبدالصمد

ام الدنيا
=====

{ ولساكى رغم الجراح
قادرة يامصر تكونى
ام الدنيا }

احلم
ويتأرفص الحلم جوايا
ف كونى اكون ليك مراية
لعنيكى مراية
يشوفوكى الناس مرسومة
فوق صدري
يقروكى مكتوبة
على جبينى
حروف تلاتة
وف زقزقة العصفور ف الصبح البدرى
يتبدل جوايا الحلم
يتمطع
يفرد جناحينه
يملا جوايا
ميت الف مكان ومكان
يرمينى لعيون الناس المسروعة
يلوى دراعى
يشد على الايد المقطوعة
يصرخ م الالم اللسان
يطوح
وساعتن مايشقشق
ف عنيا النور
والنظرة تاخدنى
ترمينى جوه بحور
تخطفنى عيون الناس
من وسط عيدان قمحى
ف قلب الغيط
من رسمة لوشى واسمى
فوق الحيط
من مدة ايد شحات
من حبة رمل ف صحرا
من طلعة شمسى ونهارى
من بيت متخبى ومتدارى
باسمع حكايات
عن قلب بينبض
عن ام بتولد
عن عيل مات
ويدوى ف جنابى الطلق
يدارى ف كفوف الخلق
تلطم الكفوف بعضها
يتشقق
يصبح زى الحلم
يفرد جناحينه عليا
يملانى من تانى
يرمينى ف صحرا بعيدة
ولا لاقى لعمرى قصيدة
ولاعارف احط العنوان
#بقلمى@سيدعبدالغنى عبدالصمد

من زمااااااااان
=========

ف الصبح افتح شباكى
واستناكى
استنى اشوفك ف عيون الخلق
افديكى بروحى
واحط الرقبة ف حبل الشنق
لجل ماتيجى
واسعد عمرى برؤياكى
لما تجينى ويارياح الشرق
********
وتطوف الدنيا
خلايا الجسم المسحورة
رغم البَهَتَان الباين
ف الصورة
شايف كل ملامحك
منقوش الوشم على جلدك
انياب وسنان مكسورة
********
ويحطوا الترحال فوق ارضك
ويدقوا العلامات
ويعدوا
يفوتوكى
اجل مايكتشفوا واحد بعدك
يدقوا ف قلبه العلامات
********
من زمان
ومن قبل ميلادى بزمان
مكتوب انى اجيلك
وتكونى قسمتى
لوكنت عارف ان حبك ليا الامان
كنت جيت قبل الاوان لدنيتى
ماكانتشى دوامة الالوان
السودة الحمرا
الزرقا الصفرة
خدتنى
غربتنى
وكنت خاصمت خطوتى
#بقلمى@سيدعبدالغنى عبدالصمد

كل الأشياء
=======

يدهشنى انى مازلت افكر
مازالت عندى بعض القدرة
ان اتقمص نفسى
ان ارتدى ثوبى المعتاد
مازالت تتكور داخل حلقى
الوان الكلمات
وعناوين الكتب والاسماء
كلها مازالت فى ذهنى
وان قلبى مازال ينبض
لكنى ..
اكثر دهشة
حين امر على نفسى الاخرى
واعلق اشباه الاشياء بالاشياء
وادخل فى غيبوبتى
واقف عند حافة الانحناء
مسلوب الارادة
ومن رئتى يضيع الهواء
اتذكر كل هذا الهراء
حتى انى اتذكر
كل الاشياء
#بقلمى@سيدعبدالغنى عبدالصمد

ناسى
===

مكلبش صوابع الكف من زمن
ف حلقة حديد
اتكرمشت منى حوافيها
لم لانت حتة م الحديد
********
دخلتنى نسماية شتا
هزت شواشيه
مع ان حبك اتولد فيا
ف يوم مانزلت منك
لكنى..
مع زحمة الوشوش والالوان
نسيت صورتى ف صورتك
*********
ياغايب ف قلب الننى
ومستنى
طلوع الشمس
الشمس طلعت من ربيع الكلام والهمس
وانت لسَّاك غايب
اتارينى انا اللى
كنت قافل عليك الرمش
#بقلمى@سيدعبدالغنى عبدالصمد