أشعار أحمد فؤاد نجم
المساهمات : 16
تاريخ التسجيل : 04/03/2019
الموقع : مصر
 |  موضوع: نيكسون جاء ( أحمد فؤاد نجم )  الأربعاء مارس 06, 2019 2:23 pm | |
| نيكسون جاء ( أحمد فؤاد نجم )
-------------------
أب ت ث جح
ألف باء
جونسون روح
نيكسون جاء
قولوا هأوأو
أو قولوا هاء
على صحافتنا
الغير غراء
ذات صباح
يا فتاح
بالجرانين على ريق النوم
جم على سهوه
كبسوا القهوه
وابتدأوا ف تضييع اليوم
إللي يقول النصر نميس
ينفع تاكسي
ويمشي رميس
وإللي يقول الفورد يا بيه
أجعص من أجعصها جعيص
وإللي يقول جونسون دا حمار
راجل
عقله عقل صغار
راجل تيس
من غير حيث
ينصب ألف جنازه بطار
بس اهو ارح
وحنرتاح
وحنتبحبح بقي ونقول
يخرب بيته
ويدلق زيته
ويعيش نيكسون لنا
على طول
نيكسون عال
ومش بطال
وإللي يقول غير كده
مقفول
شفت كلامه
إلا كلامه
صح كلام راجل مسئول
ولا عنيه
يا ختي عليه
فيهم سكس ماهوش معقول
وإللي يقول يا بقر يا شراكسه
نيكسون ماله ومال النكسه
وإللي يقول بلوتنا كبيره
وإللي يقول فضوها سيره
وإللي يقول مين مسئول
وإللي يقول
وإللي يقول
شوفوا بقي يعني
ما تفلقونيش
آدى صحافتنا
وغيرها ما فيش
مش عاجباكو ما تلومونيش
قولوا هأو أو
أو قولوا هاء
على صحافتنا
الغير غراء
| |
|
